७८ वर्षाच्या तरुण लाल 'परी'ची घोडदौड

सुरुवातीला हाताच्या बोटावर मोजण्याइतक्याच ‘एसटी’ गाड्या होत्या. एवढ्या वर्षांनंतर हाच आकडा सुमारे 15 हजारांहून अधिक आहे. आज ‘एसटी’च्या बसमधून तब्बल 55 लाखांहून अधिक प्रवासी दररोज प्रवास करतात. अशा या ‘महाराष्ट्र राज्य मार्ग परिवहन महामंडळ’ अर्थात ‘एसटी’चा आज 78वा वर्धापन दिन. ‘एसटी’च्या प्रवासी सेवेला जरी 78 वर्षे पूर्ण झाली असली, तरी ‘लाल परी’ आजही तरुणच आहे. कारण, आजच्या इंटरनेटच्या युगात ‘एसटी’नेही हा बदल स्वीकारून ‘युपीआय’ पेमेंटवरून तिकिटाचे पैसे देण्याची सोय उपलब्ध करून दिली आहे. स्मार्ट कार्डद्वारे पासेसची सुविधासुद्धा आहे. ‘व्हीटीएस’ प्रणालीचा अवलंब करून वाहनांच्या गतीवर नियंत्रण ठेवण्यात येत आहे. जर एखादा वाहनचालक बेदरकारपणे अतिवेगाने वाहन चालवीत असल्याचे निदर्शनास आल्यास, त्याच्याशी त्वरित संपर्क साधून वाहनाची गती नियंत्रणात आणून प्रवाशांची सुरक्षितता निश्चित केली जाते. आधुनिकतेचा साज ‘एसटी’ने परिधान केला असून ‘शिवशाही’, ‘शिवनेरी’ यांसारख्या वातानुकूलित वाहनांची सेवा देण्यात येत आहे. यासह प्रदूषणावर मात करण्याकरिता इलेक्ट्रिक वाहने सुरू करण्यात आली आहेत.