पंतप्रधान नरेंद्र मोदी करणार केन – बेटवा नदीजोड प्रकल्पाची पायाभरणी

 

नवी दिल्ली : (PM Narendra Modi) माजी पंतप्रधान अटल बिहारी वाजपेयी यांच्या १००व्या जयंतीनिमित्त पंतप्रधान नरेंद्र मोदी दि. २५ डिसेंबर रोजी मध्य प्रदेशात केन – बेटवा नदी जोडप्रकल्पासह विविध विकास प्रकल्पांचे उद्घाटन आणि पायाभरणी करणार आहेत.

 

पंतप्रधान मोदी केन-बेटवा नदीजोड राष्ट्रीय प्रकल्पाची पायाभरणी करतील. राष्ट्रीय दृष्टीकोन योजनेअंतर्गत हा देशातील पहिला नदीजोड प्रकल्प आहे. या प्रकल्पामुळे मध्य प्रदेश आणि उत्तर प्रदेशातील अनेक जिल्ह्यांमध्ये सिंचनाची सुविधा उपलब्ध होईल, ज्याचा लाखो शेतकरी कुटुंबांना फायदा होईल. या प्रकल्पामुळे परिसरातील नागरिकांना पिण्याच्या पाण्याचीही सोय होणार आहे. यासह जलविद्युत प्रकल्प १०० मेगावॅटहून अधिक हरित ऊर्जेचे योगदान देतील. या प्रकल्पामुळे रोजगाराच्या अनेक संधी निर्माण होतील आणि ग्रामीण अर्थव्यवस्थाही मजबूत होईल.

 

माजी पंतप्रधान अटलबिहारी वाजपेयी यांच्या १०० व्या जयंतीनिमित्त पंतप्रधान मोदी एक स्मरणार्थ टपाल तिकीट आणि नाणे जारी करतील. ते ११५३ अटल ग्राम सुशासन इमारतींची पायाभरणीही करतील. स्थानिक पातळीवर सुशासनासाठी ग्रामपंचायतींची कार्ये आणि जबाबदाऱ्यांच्या व्यावहारिक कामकाजात या इमारती महत्त्वाची भूमिका बजावतील. ऊर्जा स्वावलंबन आणि हरित ऊर्जेला चालना देण्याच्या त्यांच्या वचनबद्धतेनुसार, पंतप्रधान मध्य प्रदेशातील खंडवा जिल्ह्यातील ओंकारेश्वर येथे स्थापित ओंकारेश्वर तरंगत्या सौर प्रकल्पाचे उद्घाटन देखील करतील. हा प्रकल्प कार्बन उत्सर्जन कमी करेल आणि २०७० पर्यंत निव्वळ शून्य कार्बन उत्सर्जनाच्या सरकारच्या मिशनला हातभार लावेल.