दरडग्रस्त इर्शाळवाडीचे ‘संकटमोचक’

 

सकाळपर्यंत आजूबाजूच्या गावांतील मंडळीसुद्धा घटनास्थळी जमली. प्रत्येकजण आपल्या आप्तस्वकीयांचा शोध घेण्याचा प्रयत्न करत आहे. सुमारे 75 जणांना आतापर्यंत बाहेर काढण्यात यश आले आहे. जखमींना तातडीने वैद्यकीय उपचाराची व्यवस्था करून देण्यात आली आहे. बचावकार्य सुरू असताना नऊ जणांचे मृतदेह हाती लागले, अशा परिस्थितीमध्ये मृतदेह ठेवण्याकरिता काही व्यवस्था करणे शक्य नव्हते. अशा परिस्थितीमध्ये सर्वांशी बोलून सामूहिक दफन विधी करण्याशिवाय पर्याय नव्हता. दफनविधी करावा असे ठरल्यावर खड्डे खोदले. परंतु, पाऊस सुरू असल्यामुळे त्या खड्ड्यांमध्ये पाणी जमा होत होते. ते पाणी आम्ही उपसत होतो, अशा परिस्थितीमध्ये आम्हीच ते मृतदेह दफन केले.वाट खूप चढाची असल्यामुळे वरती जाण्याची वाट खूप कठीण होती. वरती चालत जात असताना खूप दम लागत होता. आम्ही शोधकार्यासाठी वरती जात असताना आमच्या मागेच 100-200 फुटावर असणारा आमच्या सोबतच्या अग्निशामक दलाच्याकर्मचार्‍याला हृदय विकाराच्या झटक्याने प्राण गमवावे लागले. अशा दुर्दैवी घटना आमचे मनोबल खच्चीकरण करणार्‍या होत्या. गावातील शाळेच्या इमारतीमध्ये गावातील सहा मुले झोपलेली होती. सुदैवाने तीच फक्त या दुर्घटनेमधून सुरक्षित राहू शकली. जेव्हा ही दुर्घटना घडली त्यावेळेस दरड कोसळल्याच्या आवाजामुळे जागे होऊन त्यांनी गडाच्या पायथ्याशी असणार्‍या जवळच्या लोकांना कळवले. 

 

संकटकाळी लोकांच्या मदतीस जाणे, हा मानवीय स्वभाव आहे. म्हणूनच केरळ असो किंवा सांगली, कोल्हापूरची पूरपरिस्थिती असा. माळीणची दुर्घटना, महाडचे धरण फुटणे, बुलढाणा-शिरपूर येथील अपघात काहीही संकट असो, लोकांना संकटामधून वाचवण्यास त्यांच्या मदतीस माझ्यापरीने मी प्रयत्नशील असतो. माझ्याकडून जेवढे जास्तीत जास्त शक्य होईल, ते करायचा माझा प्रयत्न असतो.