‘जन सुराज’च्याआड हिंदू विरोध

 

 

 

 

 

 

एका वृत्तसंस्थेच्या माहितीनुसार, बजरंग दलाचे जिल्हामंत्री रमण गुप्ता यांनी प्रशांत किशोर यांना घेरून त्यांच्यावर प्रश्नांची सरबत्ती केली. देवतांची विटंबना करून राजकारण सुरू करायचे आहे का? जातीवर आधारित चर्चा व फूट पाडा आणि राज्य करा हे धोरण स्वीकारून राजकारण सुरू करायचे आहे का? असे प्रश्न त्यांना विचारण्यात आले. चंपारणच्या पवित्र भूमीवर असले प्रकार खपवून घेतले जाणार नाही, असा इशाराही गुप्ता यांनी किशोर यांना दिला. यावेळी किशोर यांनीही काही कमी मुक्ताफळे उधळली असे बिलकुल नाही. ते म्हणाले की, माझे स्वप्न बिहारचे मुख्यमंत्री होण्याचे नाही. मी येथे फक्त लढण्यासाठी आलो नाही, तर जिंकण्यासाठी आलो आहे. त्यामुळे यात्रेचा मूळ उद्देश राजकारण आहे हे तर स्पष्टपणे दिसून येत आहे. यात्रेच्या नावाखाली तसेच यात्रेचा वापर हिंदू विरोधासाठी होत असेल तर त्या यात्रेचा फायदा काय? प्रत्येक वेळी हिंदूंना ‘टार्गेट’ करून किशोर यांना नेमके काय साध्य करायचे आहे, हे तेच सांगू शकतात. इथे ‘भारत जोडो’ यात्रा लोकांनी मनावर घेतली नाही तिथं किशोर यांची यात्रा तर कुणाच्या ध्यानीमनीही नाही. त्यामुळे यापुढे त्यांनी त्यांच्या जन सुराज यात्रेचा वापर हिंदू आणि हिंदुत्वविरोध अधोरेखित करण्यासाठी होऊ नये याची दक्षता घेतलेली बरी. अन्यथा यात्रेचे हसू व्हायला वेळ लागणार नाही.

 

 

 

 

गुजरात विधानसभा निवडणुकीची घोषणा झाल्यानंतर सर्वच पक्षांनी प्रचाराला सुरुवात केली असून प्रचार शिगेला पोहोचला आहे. आम आदमी पक्षाच्या अरविंद केजरीवाल यांच्यासह पंजाबचे मुख्यमंत्री भगवंत मानदेखील गुजरात पिंजून काढत आहेत. यादरम्यान आपच्या नेत्यांकडून नवनवीन ‘स्टंट’ पाहायाला मिळत आहे. दिल्ली, पंजाबप्रमाणेच गुजरातमध्येही आपने फुकटाच्या गोष्टी देण्याचा प्रचार सुरू केला आहे. आम आदमी पक्षाकडून सभा आणि रॅलीमध्ये भाड्याने माणसं आणल्याचे प्रकारही समोर आले होते.

 

 

 

केजरीवालांना अनेक ठिकाणी विरोध सहन करावा लागला. दिल्ली मॉडेलच्या नावावर पंजाब भले काबीज केले असेल. परंतु, पंजाब म्हणजे गुजरात नव्हे. याठिकाणी दोन दशकांहून अधिक काळ भाजप सत्तेत आहे. त्यामुळे केजरीवालांनी गुजरातला पंजाब समजण्याची चूक करू नये. केजरीवालांसमोर ‘मोदी-मोदी’च्याघोषणाही देण्यात आल्या होत्या. आपनंतर आता ‘एआयएमआयएम’चे प्रमुख असदुद्दीन ओवेसीदेखील आता गुजरात विधानसभा निवडणुकीसाठी गुजरातमध्ये प्रचार करत आहेत. रविवारी ते गुजरातमधील सुरतमध्ये पोहोचल्यानंतर लोकांना संबोधित करत असताना त्यांना काळे झेंडे दाखवण्यात आले. तसेच, उपस्थित लोकांनी ‘मोदी-मोदी’च्या घोषणाही दिल्या. ओवेसी सुरत पूर्व विधानसभेचे ‘एमआयएम’चे उमेदवार वसीम कुरेशी यांच्या प्रचारासाठी आले होते. मुस्लीम मतांसाठी हिंदूविरोध आळवणार्‍या ओवेसींची रणनीती सर्वच जाणून आहेत. महाराष्ट्रातही त्यांनी वंचित बहुजन आघाडीला सोबत घेतले आणि फायदा करून घेतला. यात वंचितचे मात्र मोठे नुकसान झाले.

 

 

 

गुजरातमधील अनेक सर्वेक्षणामध्येही ओवेसींची पीछेहाट होताना दिसत आहे. काळे झेंडे दाखवणे आणि ‘मोदी-मोदी’च्या घोषणा यावरून ओवेसींना बरंच काही समजले असेल. दरम्यान, गुजरातमध्ये दि. 1 आणि 5 डिसेंबरला दोन टप्प्यात मतदान होणार असून 8 डिसेंबरला निकाल लागणार आहे. पहिल्या टप्प्यात 1 डिसेंबरला 89 जागांसाठी तर दुसर्‍या टप्प्यात 93 जागांसाठी 5 डिसेंबरला मतदान होणार आहे. त्यामुळे आता अरविंद केजरीवालांना जसा नागरिकांचा विरोध सहन करावा लागला तसाच तो ओवेसींनादेखील सहन करावा लागत आहे. विषाची बीजे पेरून विजय मिळवण्याची स्वप्ने पाहणार्‍यांना गुजराती नागरिक निवडणुकीत दणका देतील यात मात्र काही शंका नाही.