चर्चा तर झालीच पाहिजे!

सचिन तेंडुलकरसारख्या महान खेळाडूबाबत भाष्य केल्यानंतर आपली चर्चा होणारच, असा काहीसा ठाम विश्वास काही गोलंदाजांना त्यावेळीही होता आणि आजही आहे. इंग्लंडचा माजी जलदगती गोलंदाज टीम ब्रेसननने यावेळी नेमके तेच केले. वर्षानुवर्षे हेच होत आले आहे आणि यापुढेही हे असेच होत राहण्याची शक्यता आहे. जोपर्यंत याबाबत ठोस कारवाई होत नाही, तोपर्यंत हे असेच होत राहणार. आंतरराष्ट्रीय क्रिकेट परिषद (आयसीसी) याबाबत जोवर ठोस नियमावली बनवत नाही, तोवर यांची खोड काही मोडणार नाही. सचिनसारख्या महान फलंदाजावर थेट उठसूठ आरोप करणारा टीम ब्रेसनन काही पहिला-वहिला गोलंदाज नाही. यापूर्वी अशा अनेक गोलंदाजांनी सचिनला चिथावण्याचा प्रकार केला आहे. हे असे प्रकार करणार्‍यांची एक भली मोठी यादीच असून यात अनेक देशांच्या खेळाडूंची नावे आहेत. वयाच्या 16व्या वर्षी सचिनने आंतरराष्ट्रीय क्रिकेटमध्ये पर्दापण केल्यानंतर पाकिस्तानचा माजी जलदगती गोलंदाज वसीम अकरम याने त्याला सर्वात आधी डिवचण्याचा प्रयत्न केला होता. सचिनने त्याला शाब्दिक उत्तर देण्याऐवजी आपल्या खेळीतूनच सडेतोड प्रत्युत्तर दिले. ऑस्ट्रेलियाचा माजी फिरकीपटू शेन वॉर्ननेही तोच कित्ता गिरवला. विश्वचषक सामन्याआधी सचिनला बाद करणे हेच एकमेव आपल्या जीवनाचे स्वप्न असल्याचे बोलून दाखवले. मात्र, त्याही वेळी सचिनने तोंडातून एकही शब्द न काढता शेन वॉर्नसह ऑस्ट्रेलियाच्या सर्व गोलंदाजांंची अशी धुलाई केली की, शेन वॉर्नला स्वप्नातही सचिन दिसू लागला. पाकिस्तानचा माजी जलदगती गोलंदाज ‘रावळपिंडी एक्सप्रेस’ शोएब अख्तरनेही विश्वचषक सामन्याआधी अशाचप्रकारे सचिनची विकेट घेण्याच्या सिंहगर्जना केल्या. मात्र, प्रत्यक्षात ज्यावेळी मैदानावर सामना झाला, त्यावेळी एकामागोमाग एक तडाखे हाणत सचिनने पाकिस्तानी गोलंदाजांची दाणादाण उडवली. सचिनला आव्हान देणार्‍या यांपैकी अनेक खेळाडूंचे क्रिकेट करिअर अवघ्या कही वर्षांतच संपुष्टातआले. मात्र, 24 वर्षे करिअर घडविणारा सचिन आजतागायत एकमेव खेळाडू असून आजपर्यंत कुणीही त्याच्या विक्रमाची बरोबरीकरण्यापर्यंत देखील जवळपास पोहोचलेले नाही. क्रिकेट पूर्वीप्रमाणे आजही सुरु आहे. मात्र, सचिनसारखा शांतचित्ती खेळाडू या जगतात नाही. त्यामुळेच अनेकदा खेळादरम्यान वादाचे प्रसंग उद्भवत असून हाणामारीपर्यंत प्रकरणे पोहोचत आहेत. हे टाळण्यासाठी आयसीसीने एखादी नियमावली आणण्याची गरज निर्माण झाल्याचे क्रिकेट समीक्षकांचे म्हणणे आहे.