कोरोनावर मात करणारी ‘मनीषा’

‘कोविड’काळात अनेकांवर बेरोजगारीची कुर्‍हाड कोसळली, तर अनेकांना ५० टक्क्यांपेक्षा जास्त पगारकपातीचा सामना करावा लागला. त्यामुळे चांगल्या सोसायटीत राहणार्‍या नागरिकांची आर्थिक फरफट सुरू झाली. मध्यमवर्गीय माणूस हा स्वाभिमानी आहे. तो कुणाकडे मदतीसाठी हात पसरणार नाही, हे धात्रक यांनी ओळखले होते. गरजूंनी धात्रक यांच्याकडे पोहोचण्याआधी त्याच गरजूंपर्यंत पोहोचले व त्यांनी गरजूंना मदत केली. कोणतेही फोटो न काढता, कोणतीही प्रसिद्धी न करता, त्यांनी प्रभागातील प्रत्येक सोसायटीत फूड पॅकेटचे वितरण केले. काहींना त्यांनी धान्य वितरण केले. धान्य वितरण सरसकट सगळ्यांनाच त्या करीत आहेत. त्यामुळे ‘ही व्यक्ती माझ्या प्रभागातील नाही,’ हा भेदभाव त्यांनी केला नाही. गणेश मंदिर, एलोरा सोसायटी प्रभाग आणि विष्णुनगर प्रभाग याविषयी इतर प्रभागातील नागरिकांनाही मदत केली. प्रत्येकाच्या मदतीला त्या धावून गेल्या. त्यांचे अन्नधान्यवाटपाचे मदतकार्य अजूनही सुरूच आहे. प्रत्येक घरात किमान तीन वेळा तरी अन्नधान्याचे किट दिले आहेत. सुरुवातीला सात हजार नागरिकांना अन्नधान्याचे किट दिले आहेत. ‘लॉकडाऊन’मुळे डोंबिवली व बाहेरगावी अडकलेल्या नागरिकांना त्यांच्या इच्छितस्थळी जाण्यास पोलीस प्रशासन व महापालिका यांच्या मदतीने काम केले. धात्रकांसारख्या प्रसिद्धीचे हाव नसणार्‍या, नि:स्वार्थी भाजप कार्यकर्त्या अपवादानेच मिळतात. धात्रक यांच्याकडे असलेली नम्रता, सदैव हसतमुख आणि दांडगा जनसंपर्क या आधारावर, ‘तुम्ही हाक मारा, आम्ही तुमच्यासाठी, तुमच्या मदतीसाठी व तुमच्या अडचणी सोडविण्यासाठी सदैव तयार आहोत.’ हेच त्या आपल्या प्रभागातील नागरिकांना सांगत असतात. त्यांच्या वर्तनातून आणि वागणुकीतून नेहमी या गोष्टी मदत घेणार्‍या नागरिकांना प्रतित होत असतात.