सरनाईकांच्या अडचणीत वाढ : सोमय्या देणार टक्कर

ठाणे : शिवसेना आमदार प्रताप सरनाईक आणि भाजपचे माजी खासदार किरीट सोमैय्या यांच्यातील वाद शमता शमेनासा झाला आहे. दोघांनीही एकमेकांविरोधात पोलीसांकडे तक्रारी नोंदवल्या आहेत. 'व्होल्टास कंपनी कोविड सेंटर' वरील आरोपांना उत्तर देताना सोमैया व भाजप गटनेते संजय वाघुले यांची पोलीस चौकशी करण्याची मागणी लाचलुचपत प्रतिबंधक विभागाकडे गुरुवारी सरनाईक यांनी केली असताना सोमय्या यांनीही शुक्रवारी ठाण्यातील वर्तकनगर पोलीस ठाण्यात सरनाईक यांच्याविरोधात तकार दाखल केली आहे. 

 

तसेच, १०० कोटींचा दाव्याची खिल्ली उडवताना सोमय्या यांनी, 'चोर मचाये शोर'असे म्हटले आहे. भाजप नेते किरीट सोमय्या यांनी शुक्रवारी शिवसेनेचे ठाण्यातील ओवळा-माजिवड्याचे आमदार प्रताप सरनाईक यांच्या विरोधात वर्तकनगर पोलीस ठाण्यात तक्रार अर्ज दाखल केला. प्रताप सरनाईक यांची ठाण्यातील विहंग गार्डनमधील दोन १३ मजली इमारती अनधिकृत असुन त्यांनी रहिवाशांची फसवणूक केली आहे. तेव्हा सरनाईक यांच्यावर कारवाई करण्यात यावी, असा तक्रार अर्ज किरीट सोमय्या यांनी वर्तकनगर पोलीस ठाण्यात दाखल केला.