श्रीनगर : जम्मू-काश्मीरची राजधानी श्रीनगरमध्ये अतिरेक्यांनी सीआरपीएफच्या ताफ्याला लक्ष्य करत ग्रेनेड हल्ला केला. या हल्ल्यात स्थानिक नागरिक किरकोळ जखमी झाले आहेत. जखमींना उपचारासाठी रुग्णालयात नेण्यात आले आहे. त्याचवेळी सुरक्षा दलाने परिसर घेरला असून शोध मोहीम सुरू केली आहे.
श्रीनगरच्या डाउनटाउन कावदारा भागात आज शनिवारी दहशतवाद्यांनी ग्रेनेड हल्ला केला. या हल्ल्यानंतर परिसराची सुरक्षा वाढविण्यात आली आहे. पाकिस्तान आणि दहशतवादी संघटना काश्मीर खोऱ्यातील वातावरण खराब करण्यासाठी प्रयत्नशील आहेत. स्थानिक लोकांमध्ये भीती पसरविण्यासाठी अशा घटना घडवून आणल्या जात आहे.
यापूर्वी काल म्हणजेच शुक्रवारी संध्याकाळी साडेतीनच्या सुमारास जम्मू-काश्मीरमधील नौशेरा सेक्टरमध्ये स्फोट झाला. या स्फोटात सैन्याच्या लेफ्टनंटसह चार सैनिक गंभीर जखमी झाले. यासह परिसर घेराव घालून सुरक्षा वाढविण्यात आली आहे. लष्कराच्या सूत्रांनी सांगितले की, लष्कराची पेट्रोलिंग टीम सीमावर्ती भागात दौर्यावर होती. यावेळी हा स्फोट झाला होता.