देवपणाला लागले...

मराठा आरक्षणाचा मुद्दा मनोज जरांगे पाटील यांनी चांगलाच तापवला आहे. संपूर्ण महाराष्ट्रात या प्रकरणाने चांगलीच राळ उडवून दिली आहे. समाजाचा विषय म्हणून एकवेळ जरांगे पाटलांचे बरोबर आहे. पण या प्रकरणाला विरोधी पक्षाचे नेते हवा देऊन, राज्य धुमसत कसे राहील आणि असंतोष कसा माजेल, यासाठी धडपड करताना दिसत आहेत. या कुरघोडीच्या राजकारणात महाविकास आघाडीतील सर्वच वाचाळवीर एकत्र गरळ ओकत महाराष्ट्रभर फिरत आहेत. नुकत्याच नाशिक दौर्‍यावर असलेले उबाठा गटाचे युवराज आदित्य ठाकरे यांनी या प्रकरणाला बत्ती देण्याचा प्रयत्न केला आहे. नाशिक भ्रमंती करत असताना छावा क्रांतिवीर सेनेने त्यांना निवेदन देत मराठा आरक्षणाविषयी आपल्या पक्षाची भूमिका स्पष्ट करण्यास सांगितले. यावर ठाकरे यांनी आपली भूमिका मांडणे बाजूला ठेवले आणि भाजपने काय करायला पाहिजे, याचेच सल्ले देत बसले. उपमुख्यमंत्री देवेंद्र फडणवीस यांना कायम पाण्यात पाहणारे ठाकरे यांनी आरक्षणाचे खापर त्यांच्या डोक्यावर फोडण्याचा केविलवाणा प्रयत्न केला. तसेच सवयीप्रमाणे मुख्यमंत्री एकनाथ शिंदे यांच्यावर तोंडसुख घेताना छत्रपती शिवाजी महाराजांसमोर मराठा आरक्षण मिळवून देण्याची शपथ घेतली असल्याचे सांगितले. पण मविआचे सरकार असताना देवेंद्र फडणवीस यांनी उच्च न्यायालयात टिकवलेले आरक्षण या समाजद्रोह्यांनी सर्वोच्च न्यायालयात घालवले, हे सोयीस्करपणे आदित्य ठाकरे विसरभोळेपणाचे नाटक करत विसरत आहेत. तर दुसरीकडे पक्षाच्या मेळाव्यासाठी आलेले काँग्रेसचे महाराष्ट्र प्रभारी रमेश चेन्निथला आणि प्रदेशाध्यक्ष नाना पटोले यांना मराठा आंदोलकांनी घेराव घालत मराठा समाजाला ओबीसी प्रवर्गातून आरक्षण आणि सगेसोयरे कायद्याची अंमलबजावणी यावर भूमिका स्पष्ट करण्यास सांगितले. यावर आपण सत्ताधारी पक्षाला जाब विचारणार असल्याचे पटोले यांनी आंदोलकांना सांगितले. मात्र, पटोले हे कसे विसरतात की, सर्वात जास्त काळ सत्ता उबवलेल्या काँग्रेसने का नाही आरक्षण दिले? याचे उत्तर पटोलेंकडे नाही आणि आता सत्ताधारी महायुतीला जाब विचारायला निघाले आहेत. अहो नाना पटोले, जनतेला एवढेसुद्धा वेड्यात काढू नका, जनतेला सर्व कळते. हे मविआच्या नेत्यांना सांगितले पाहिजे की, मराठा आरक्षणाच्या आड येणार्‍या झारीतील शुक्राचार्य खरे तर तुम्हीच आहात!