महाराष्ट्रातून एका रात्रीत गाठा प्रयागराज

मुंबई, दि.६ : प्रतिनिधी उत्तर प्रदेशमधील महाकुंभ मेळाव्याला जाणाऱ्या भाविकांसाठी मध्य रेल्वेच्या आठ विशेष सेवा धावणार आहे. प्रयागराज येथे सुरु असणाऱ्या कुंभमेळा- २०२५ दरम्यान प्रवाशांची अतिरिक्त गर्दी लक्षात घेऊन लोकमान्य टिळक टर्मिनस मुंबई आणि बनारस तसेच नागपूर आणि दानापूर दरम्यान ८ अतिरिक्त विशेष सेवा चालवणार आहे. कुंभमेळा विशेषचे सर्व पीआरएस केंद्रांवर आणि www.irctc.co.in संकेतस्थळावर विशेष शुल्कासह बुकिंग सुरू आहे. या विशेष गाड्यांमध्ये, सामान्य द्वितीय श्रेणीचे डबे अनारक्षित कोच म्हणून चालवले जातील आणि तिकिटे यूटीएस द्वारे बुक करता येतील, अशी माहिती मध्य रेल्वेने दिली आहे.

लोकमान्य टिळक टर्मिनस - बनारस कुंभमेळा विशेष सेवा चालविण्यात येतील. ०१०३१ ही कुंभमेळा विशेष दि.८ फेब्रुवारी रोजी लोकमान्य टिळक टर्मिनस येथून रात्री १२.०५ वाजता सुटेल आणि बनारस येथे दुसऱ्या दिवशी संध्याकाळी ०६.४५ वाजता पोहोचेल. तर परतीची ०१०३२ कुंभमेळा विशेष ट्रेन दि. ०६ फेब्रुवारी आणि दि. ०९ फेब्रुवारी रोजी सकाळी १०.०० वाजता बनारस येथून सुटेल आणि लोकमान्य टिळक टर्मिनस येथे दुसऱ्या दिवशी संध्याकाळी ४.४० वाजता पोहोचेल. या ट्रेनला ठाणे, कल्याण, इगतपुरी, नाशिक रोड, जळगाव, भुसावळ, इटारसी, पिपरिया, नरसिंहपूर, जबलपूर, कटनी, मैहर, सतना, माणिकपूर, प्रयागराज छिवकी, मिर्झापूर आणि चुनार इत्यादी थांबे देण्यात येतील.

ट्रेन क्रमांक ०१२०३ कुंभमेळा विशेष ट्रेन दि ०८ फेब्रुवारी रोजी दुपारी ३ वाजता नागपूर येथून सुटेल आणि दानापूर येथे दुसऱ्या दिवशी दुपारी १ वाजता दानापूर येथे पोहोचेल. तर परतीची सेवा देणारी ०१२०४ ही कुंभमेळा विशेष ट्रेन दि.०९ फेब्रुवारी रोजी दुपारी २.३० वाजता दानापूर येथून सुटेल आणि नागपूर येथे दुसऱ्या दिवशी सकाळी ११.४० वाजता पोहोचेल. या ट्रेनला गोंदिया, बालाघाट, नैनपूर, घानसोर, जबलपूर, कटनी, मैहर, सतना, माणिकपूर, प्रयागराज छिवकी, मिर्झापूर, चुनार, पं. दीनदयाल उपाध्याय जंक्शन, बक्सर आणि आरा ई. थम्बई देण्यात येतील.