सोमनाथ ताडोबा सफारी गेटमुळे रोजगाराच्या संधी : वनमंत्री सुधीर मुनगंटीवार

चंद्रपूर : “ ‘ताडोबा अंधारी व्याघ्र’ प्रकल्पातील सोमनाथ सफारी गेटच्या माध्यमातून पर्यटकांना जंगल भ्रमंतीसह व्याघ्र पर्यटनाचा आनंद लुटता येणार आहे. विशेष म्हणजे या नव्या गेटच्या निमित्ताने तरुणांसाठी रोजगाराचे एक नवे दालन खुले झाले आहे,” असे प्रतिपादन राज्याचे वनमंत्री तथा चंद्रपूरचे पालकमंत्री सुधीर मुनगंटीवार यांनी केले. मूल तालुक्यातील सोमनाथ देवस्थान येथे सोमनाथ सफारी पर्यटन गेटचे त्यांच्या हस्ते उद्घाटन झाले. त्यावेळी ते बोलत होते.

वन्य प्राण्यांच्या हल्ल्यात मृत्यू झाल्यास २० लाखांऐवजी आता २५ लाख रुपये देण्याचा निर्णय घेण्यात आल्याची घोषणा मुनगंटीवार यांनी केली. वन्य प्राण्यांच्या हल्ल्यात जखमी व्यक्तीला सरकारी रुग्णालयात उपचारासाठी नेल्यास पाच लाख, तर खासगी रुग्णालयात उपचार घेतल्यास १ लाख, २५ हजारांची मदत दिली जायची. आता वन्य प्राण्यांच्या हल्ल्यात जखमी व्यक्तीस कोणत्याही खासगी दवाखान्यात उपचारासाठी पाच लाखापर्यंतची मदत देण्यात येत आहे, असेही ते म्हणाले.