बाळासाहेब देसाईंप्रमाणे मी देखील लवकरच क्रांतिकारी निर्णय घेईन!

 

 

 

मुंबई : बाळासाहेब देसाई यांनी १९७७-७८ मध्ये विधानसभा अध्यक्ष म्हणून काम केलं. देसाई यांनी ज्या प्रमाणं क्रांतिकारी निर्णय घेतले. त्यातून काही तरी शिकून मी देखील लवकरच क्रांतिकारी निर्णय घेईन, असं राहुल नार्वेकर म्हणाले. लोकनेते बाळासाहेब देसाई यांच्या दौलत या चरित्र ग्रंथाच्या प्रकाशनाचा सोहळा राजभवनात पार पडला. यावेळी राज्यपाल रमेश बैस, मंत्री शंभूराज देसाई, गिरीश महाजन, मगंलप्रभात लोढा, दादा भुसे, गुलाबराव पाटील, नरहरी झिरवळ आणि विधानसभा अध्यक्ष राहुल नार्वेकर उपस्थित होते. दौलत या ग्रंथाचं लेखन मधुकर भावे यांनी केलं आहे. राहुल नार्वेकर यांनी यावेळी बोलताना मोठं वक्तव्य केलं.

 

नार्वेकर म्हणाले, "माझ्यासाठी या कार्यक्रमाला उपस्थित राहणं ही भाग्याची गोष्ट आहे. या पुस्तकाचं नाव अत्यंत योग्य आहे. पुढील पिढीसाठी हा ग्रंथ दौलत म्हणून असणार आहे. काही लोकं आपल्या कर्तुत्त्वातून कार्यातून आपल्याला घडवतात. काही लोकं आपल्या कर्तुत्त्वातून समाज घडवतात, देश घडवतात. लोकनेते बाळासाहेब देसाई हे त्यातलं एक व्यक्तिमत्व आहे. ज्यांनी आपल्या कार्यातून समाज घडवला, ज्यांनी आपल्या कार्यातून राज्य घडवलं. देसाई यांनी ज्या प्रमाणं क्रांतिकारी निर्णय घेतले. त्यातून काही तरी शिकून मी देखील लवकरच क्रांतिकारी निर्णय घेईन." असं राहुल नार्वेकर म्हणाले.