"वरुण सरदेसाईंवरील आरोपांमुळे देशपांडेंवर हल्ला?"

संदीप देशपांडे vs वरुण सरदेसाई

मुंबई : मनसे नेते संदीप देशपांडे यांच्यावर शिवाजी पार्कवर मॉर्निंग वॉकला गेले असताना हल्ला झाला. याबाबत भाजप आमदार नितेश राणे यांनी गंभीर आरोप केले आहेत. युवासेना सचिव वरूण सरदेसाई यांच्याकडे संशयाची सुई जात असल्याचा गौप्यस्फोट नितेश राणे यांनी केला आहे.


वरुण सरदेसाईंवर मनसेतर्फे संदीप देशपांडेंनी अनेक आरोप केले आहेत. त्यामुळेच हा हल्ला झाला, असा आरोप नितेश राणे यांनी केला आहे. देशपांडेंचा सुशांत सिंह राजपुत, दिशा सालियन, मनसुख हिरेन करणार होतात का? संबधितांची चौकशी झाली पाहीजे, अशी मागणी नितेश राणे यांनी केली आहे.

संदीप देशपांडे नेहमीप्रमाणे मॉर्निंग वॉकला गेले असताना अचानक चार अज्ञातांनी त्यांच्यावर हल्ला केला. लोखंडी रॉड आणि स्टम्पने मारहाण करत देशपांडेंना खाली पाडले. यावेळी देशपांडेंना प्रतिकारही करता आला नाही. चौघेही तोंडावर मास्क लावून आले होते. त्यानंतर पसार झाले. हल्ल्यात जखमी देशपांडेंवर हिंदुजा रुग्णालयात उपचार करण्यात आले. त्यानंतर त्यांना घरी पाठवण्यात आले आहे.

संदीप देशपांडेंनी हल्ल्यानंतर प्रतिक्रीया दिली आहे. हिंदूजा रुग्णालयाच्या आवाराबाहेर आल्यावर माध्यमांनी त्यांना या संदर्भात विचारणा केली. मी कुणालाही घाबरणारा नाही, माझे काम मी सुरूच ठेवणार, असेही ते म्हणाले.