सेबीचा गुंतवणूकदारांना दिलासा; 'या' नियमांमध्ये केले बदल

21-Nov-2023

Total Views | 95

मुंबई : भौतिक शेअर धारकांना दिलासा देण्यासाठी, बाजार नियामक सेबीने पॅन क्रमांक, केवायसी तपशील आणि नामांकनाशिवाय हे गोठवण्याची आवश्यकता दूर केली आहे. सिक्युरिटीज अँड एक्सचेंज बोर्ड ऑफ इंडियाने (सेबी) याबाबत परिपत्रक जारी केले आहे. या परिपत्रकानुसार नियम सुलभ करण्याच्या उद्देशाने हे पाऊल उचलण्यात आले असून ते लगेच लागू होणार आहे.

रजिस्ट्रार असोसिएशन ऑफ इंडिया आणि गुंतवणूकदारांकडून अभिप्राय मिळाल्यानंतर हा निर्णय घेण्यात आला आहे. नियमानुसार, सूचीबद्ध कंपन्यांच्या भौतिक समभागांच्या सर्व धारकांना त्यांच्या संबंधित फोलिओ क्रमांकांसाठी पॅन, नामांकन, संपर्क तपशील, बँक खात्याचे तपशील आणि नमुना स्वाक्षरी देणे बंधनकारक होते.

सेबीने मे महिन्यामध्ये सांगितले होते की ज्या फोलिओचे तपशील १ ऑक्टोबर २०२३ नंतर उपलब्ध नाहीत, ते रजिस्ट्रार ऑफ इश्यू आणि शेअर ट्रान्सफर एजंटद्वारे गोठवले जातील. मे महिन्यात जारी केलेल्या परिपत्रकात सुधारणा करत सेबीने सांगितले की फ्रीझ या शब्दाचा संदर्भ काढून टाकण्यात आला आहे.

शेअर ट्रेडिंग सुलभ करण्यासाठी त्यांनी हा निर्णय घेतल्याचे सेबीने म्हटले आहे. या नियमात बदल केल्यानंतर गुंतवणूकदारांसमोरील अनपेक्षित आव्हाने बऱ्याच अंशी कमी होतील. जेव्हा फोलिओ गोठवले गेले तेव्हा गुंतवणूकदारांना अनेक समस्यांना तोंड द्यावे लागले. गुंतवणूकदारांच्या सूचनांनंतर सेबीने हा निर्णय घेतला आहे.