अफगाणिस्तानच्या मुद्यावरुन अजित डोवालांचे 'या' देशांसोबत खलबतं

नवी दिल्ली - राष्ट्रीय सुरक्षा सल्लागार (एनएसए) अजित डोवाल यांनी बुधवारी (10 नोव्हेंबर 2021) दिल्लीमध्ये अफगाणिस्तानच्या अनुषंगाने असणाऱ्या संकटाबाबत सात देशांच्या राष्ट्रीय सुरक्षा सल्लागारांसोबत बैठक घेतली. रशिया, इराण, कझाकिस्तान, किर्गिस्तान, ताजिकिस्तान, तुर्कमेनिस्तान आणि उझबेकिस्तानच्या राष्ट्रीय सुरक्षा सल्लागारांनी अफगाणिस्तानवरील दिल्ली येथील प्रादेशिक सुरक्षा संवादात भाग घेतला.

या बैठकीनंतर पंतप्रधान नरेंद्र मोदी यांनी सात देशांच्या राष्ट्रीय सुरक्षा सल्लागारांची भेट घेतली. बैठकीत अजित डोवाल म्हणाले की, अफगाणिस्तानमधील घडामोडींचा केवळ तेथे राहणार्‍या लोकांवरच नाही तर त्याच्या शेजारी देशांवर आणि प्रदेशासाठी देखील महत्त्वपूर्ण परिणाम आहेत. बैठक सुरू होण्यापूर्वी डोवाल यांनी सात देशांसोबतची ही चर्चा फलदायी ठरेल, अशी आशा व्यक्त केली. ते म्हणाले, “आमच्यामध्ये अफगाणिस्तानच्या मुद्याबाबत चर्चा करण्याची वेळ आली आहे. मला खात्री आहे की आमच्या चर्चेमुळे अफगाण लोकांना मदत होईल आणि आमची सामूहिक सुरक्षा वाढेल.”

 

 

तालिबानने काबूलवर ताबा घेतल्यानंतर दहशतवाद, अतिरेकी आणि अंमली पदार्थांची तस्करी या वाढत्या धोक्यांचा सामना करण्यासाठी व्यावहारिक सहकार्यासाठी एक समान दृष्टीकोन मजबूत करण्याच्या उद्देशाने भारताने या बैठकीचे आयोजन केले. या महत्त्वाच्या बैठकीसाठी भारताने पाकिस्तान आणि चीनलाही निमंत्रित केले होते, मात्र दोन्ही देशांनी त्यात सहभागी होण्यास नकार दिल्याचे सांगण्यात येत आहे. पूर्वनियोजित कार्यक्रम पाहता चीनने या बैठकीत सहभागी न होण्याचे कारण दिले आहे. दुसरीकडे, पाकिस्तानने अफगाणिस्तानबद्दल भारताच्या "नकारात्मक वृत्ती"ला जबाबदार धरले आणि बैठक वगळण्याचा निर्णय घेतला.