सांताक्रूझ चेंबूर जोडरस्ता केबल-स्टे ब्रिज १००% पूर्ण! ; अंतिम टप्प्यातील कामे सुरू असल्याची एमएमआरडीएची माहिती

मुंबई :सांताक्रूझ-चेंबूर लिंक रोड प्रकल्पाच्या अखेरच्या टप्प्यातील सीएसटी रस्त्यावरून पश्चिम द्रुतगती महामार्गावर वाकोला नाला येथे उभारण्यात येणाऱ्या केबल स्टे पुलाच्या उभारणीचे काम पूर्ण झाले असल्याची माहिती मुंबई महानगर प्रदेश विकास प्राधिकरणाने दिली आहे. एमएमआरडीए आयुक्त डॉ. संजय मुखर्जी आणि अतिरिक्त महानगर आयुक्त (१) विक्रम कुमार यांनी सांताक्रूझ-चेंबूर लिंक रोड विस्तार प्रकल्पस्थळास भेट देऊन अंतिम तयारीचा आढावा घेतला.

मुंबई महानगर प्रदेश विकास प्राधिकरणाने (एमएमआरडीए) पश्चिम द्रुतगती महामार्गावरून जाणाऱ्या या मार्गाचे बांधकाम पूर्ण केले आहे. आता अंतिम टप्प्यातील कामे सुरु आहेत. पुढच्या टप्प्यात जड वाहने किंवा विशेष वजन वापरून भार चाचणी घेत पुलाची ताकद तपासण्यात येईल. ही चाचणी उत्तीर्ण झाल्यानंतरच हा पूल जनतेसाठी खुला केला जाईल. वाकोला उड्डाणपुलावरून जाण्यासाठी आवश्यक असलेला तीक्ष्ण वक्र आणि उंची यामुळे अभियंत्यांनी पारंपारिक काँक्रीट गर्डरवर केबल-स्टेड डिझाइन निवडले. या डिझाइनमध्ये कमी खांबांची आवश्यकता असते आणि लांबीने हे पूल बांधणे सोपे आहे. केबल-स्टेड पूल २५० मीटर लांब आहे आणि तो ऑर्थोट्रॉपिक स्टील डेक (OSD) वापरून बांधण्यात आला आहे, जो काँक्रीट डेकपेक्षा हलका आणि मजबूत आहे. यामुळे खांबांवर कमी भार पडतो आणि बांधकाम जलद होते. पुलाला ९० अंशांचा वळण आहे. तो जमिनीपासून २२ मीटर वर आणि विद्यमान वाकोला उड्डाणपुलापासून ९ मीटर अंतरावर बांधला आहे. पुलाची स्थापत्य कामे पूर्ण झाली आहेत.

अंतिम टप्प्यातील कामे

- सूचना फलक बसविणे
- केबल-स्टे ब्रिजखालील तात्पुरते दिलेले आधार काढणे
- रंगकाम व अंतिम सौंदर्यीकरण
- स्ट्रीट लाईट आणि मध्यवर्ती लँडस्केपिंग

अभियांत्रिकी वैशिष्ट्ये

दक्षिण आशियातील पहिला अशा प्रकारचा केबल-स्टे ब्रिज, ज्यामध्ये १०० मीटरचे तीव्र वळण आहे. २१५ मीटर लांबीचा ऑर्थोट्रॉपिक स्टील डेक असलेला हा पूलवेस्टर्न एक्स्प्रेस हायवेवरील उड्डाणपुलावरून जाणारा व जमिनीपासून २५ मीटर उंचीवर असलेला पूल आहे. दुपदरी मार्गिका असणारा हा पूल वाय आकाराचा पायलॉन उभारून मेट्रो लाइन ३ आणि इतर भूमिगत सुविधांना धक्का न लावता बांधलेला आहे. कुर्ला ते विमानतळाच्या अगदी आधी पानबाई शाळेपर्यंत थेट मार्ग असून हा पूल ईस्टर्न-वेस्टर्न एक्स्प्रेस हायवे दरम्यान सिग्नल-विरहित आणि अखंड वाहतूक सुविधा देईल.

प्रकल्पाचे महत्त्व

- कुर्ला ते विमानतळ सिग्नल-विरहित वाहतूक
- वाकोला, बिकेसी आणि एलबीएस मार्गावरील वाहतूककोंडी कमी होणार
- प्रवासाचा वेळ व इंधन वाचणार
- एससीएलआर, इइएच आणि डब्ल्यूइएच यांमधून पूर्व-पश्चिम वाहतुकीत सुलभता
- भविष्यातील दुसऱ्या टप्प्याच्या एकत्रित जोडणीसाठी सज्ज रचना

"या आयकॉनिक ब्रिजचे काम आता अंतिम टप्प्यात असून तो नागरिकांच्या सेवेत लवकरच सुरू करण्यात येणार आहे –पावसाळ्यातच हा जनतेच्या सेवेत सुरू करण्यात येईल! हा पूल केवळ वाहतूककोंडीवरचा उपाय नसून मुंबईसाठी एक नवा लँडमार्कदेखील आहे. नाविन्य आणि परिणामकारकतेचा संगम साधणारे हे उत्तम उदाहरण आहे. मुंबईच्या 'सिमलेस कनेक्टिव्हिटी' च्या दिशेने आणखी एक पाऊल आहे.”

- डॉ, संजय मुखर्जी, महानगर आयुक्त, एमएमआरडीए.