ठेवीदारांच्या हिताचे रक्षण करणे ही संपूर्ण सहकारी बँकिंग क्षेत्राची नैतिक जबाबदारी!

मुंबई : न्यु इंडिया कोऑपरेटिव्ह बँकेतील आर्थीक घोटाळ्यामुळे शुक्रवार दिनांक १४ फेब्रुवारी रोजी रिझर्व्ह बँकेने परिपत्रक काढत न्यु इंडिया कोऑपरेटिव्ह बँकेच्या व्यवहारांवर बंदी आणली आहे. १२२ कोटींच्या घोटाळ्यात बँकेचे जनरल मॅनेजर हितेश मेहता यांना १५ फेब्रुवारी रोजी अटक करण्यात आली आहे. याच पार्श्वभूमीवर सहकारी बँकिंग क्षेत्राबद्दल विविध स्तरांमधून प्रतिक्रीया उमटत असताना, बँकिंग क्षेत्रातील तज्ञ, अभ्यासक विद्याधर अनास्कर यांनी सुद्धा आपली प्रतिक्रीया नोंदवली आहे. सदर प्रकरणावर भाष्य करताना ते म्हणाले की "संपूर्ण भारतभर `आंतरराष्ट्रीय सहकार वर्ष' साजरे होत असतांना, मुंबई येथील न्यू इंडिया को-ऑपरेटिव्ह बँकेवर रिझर्व्ह बँकेने आर्थिक निर्बंध लादल्याची घटना दुर्दैवी आहे.`सहकार से समृध्दी' हा नारा देत सहकाराचे महत्व समाजाला पटवून देण्यासाठी केंद्रीय सहकार मंत्रालय मनापासून प्रयत्न करत असतानाच घडणाऱ्या या अशा घटनांमुळेच सहकारी बँकिंग क्षेत्रावरील विश्वास ढासळताना दिसून येतो. सहकाराअंतर्गत सहकार' 'Co-operation amongst Co-operative' हे सहकारात प्रमुख तत्व मानले गेले आहे. त्यानुसार आपापसात सहकार्याची भावना असण्याची गरज प्रतिपादन केली जात आहे.या पार्श्वभूमीवर अडचणीत आलेल्या न्यू इंडिया को-ऑपरेटिव्ह बँकेला मुंबईस्थित इतर सहकारी बँकांनी मदतीचा हात पुढे करणे गरजेचे आहे. त्यासाठी सहकारी बँकांचे असोसिएशन आणि फेडरेशन यांनी पुढाकार घेणे आवश्यक आहे. असे प्रतिपादन विद्याधर अनास्कर यांनी केले.