सिंधुदुर्गातून व्हेलचे रेस्क्यू; जिल्ह्यात पहिल्यांदाच वाहून आला 'या' प्रजातीचा व्हेल

मुंबई (विशेष प्रतिनिधी) - सिंधुदुर्गातील तळाशील खाडीत गुरुवार दि. २३ जानेवारी रोजी वाहून आलेल्या सात फुटांच्या 'ड्वार्फ स्पर्म व्हेल' या सागरी सस्तन प्राण्याला सुखरुप समुद्रात सोडण्यात आले (whale released from sindhudurg). वन विभागाच्या 'कांदळवन कक्ष-दक्षिण कोकण'च्या कर्मचाऱ्यांनी स्थानिक मच्छीमारांच्या मदतीने खाडीत अडकलेल्या या व्हेलला खोल समुद्रात जाऊन सोडले. (whale released from sindhudurg)

 

 

तळाशील खाडीतील जुवे पाणखोल बेटाजवळील उथळ पाण्यात गुरुवारी सकाळी ९ वाजण्याच्या सुमारास सात फुटांचा आणि ३०० किलो वजनाचा व्हेल वाहून आल्याचे स्थानिकांच्या निदर्शनास आले. स्थानिक मच्छिमारांनी या व्हेलच्या शेपटीला दोरी बांधून त्याला पाण्यात सोडण्याचा प्रयत्न केला. मात्र, पुन्हा एकदा व्हेल उथळ पाण्यात वाहून आला. त्यामुळे स्थानिकांनी याची माहिती वन विभागाला दिली. 'कांदळवन कक्ष-दक्षिण कोकण'च्या कर्मचाऱ्यांनी 'कांदळवन प्रतिष्ठान'च्या तज्ज्ञांसमेवत घटनास्थळी धाव घेतली. मुंबईचे तज्ज्ञ पशुवैद्यक डाॅ. दिनेश विन्हेरकर यांच्या मार्गदर्शनाखाली स्थानिक पशुवैद्यक डाॅ. लांडगे यांनी व्हेलवर प्रथमोपचार केले. त्यानंतर कर्मचाऱ्यांनी मच्छीमारांच्या मदतीने दोन बोटींच्या मध्ये ग्रीन शेड जाळी बांधून त्यावर लगतपणे व्हेलला घेतले. साधरण दुपारी २.३० वाजण्याच्या सुमारास खोल समुद्रात जाऊन कर्मचाऱ्यांनी व्हेलला सोडल्याची माहिती सिंधुदुर्गचे प्रभारी वनपरिक्षेत्र अधिकारी (कांदळवन कक्ष-दक्षिण कोकण) समीर शिंदे यांनी दै. 'मुंबई तरुण भारत'शी बोलताना दिली.

 

 

वाहून आलेला व्हेल हा 'ड्वार्फ स्पर्म व्हेल' या प्रजातीचा निमवयस्क व्हेल असल्याची माहिती मिहीर सुळे यांनी दिली आहे. या प्रजातीचा व्हेल प्रथमच सिंधुदुर्गच्या किनाऱ्यावर वाहून आल्याचे त्यांनी सांगितले. ही प्रजात किनाऱ्याजवळ अधिवास करत नसून खोल समुद्रात अधिवास करत असल्याची माहिती त्यांनी दिली. व्हेल बचावाचे हे काम वनपरिक्षेत्र अधिकारी समीर शिंदे यांच्या मार्गदर्शनाअंतर्गत वनरक्षक दत्ता मुखाडे, वनरक्षक संजीव जाधव, 'कांदळवन प्रतिष्ठान'चे केदार पालव, मयुर पानसरे यांनी स्थानिक गावकरी विवेक रेवणकर आणि विवेक गावकर यांच्या मदतीने केले.