ठाणे महापालिकेसाठी नविन मुख्यालय - प्रशासनाच्या हालचालींना वेग
रेमंडच्या सुविधा भूखंडावर होणार ३२ मजली ठामपा मुख्यालय
06-Aug-2024
Total Views | 40
ठाणे : ठाणे महापालिकेचे मुख्यालय सध्या पाचपाखाडी भागात आहे.परंतु तेथील जागा कमी पडत असल्याने नवीन मुख्यालय उभारण्यात येणार आहे. राज्य शासनाने कॅडबरी जंक्शन रेमंड येथील ४ एकरच्या सुविधा भुखंडावर ३२ मजली नवे महापालिका भवन उभारण्याच्या प्रक्रियेला वेग आला आहे. ठाणे महापालिकेने यासंदर्भात निविदा प्रसिद्ध केली असून तब्बल ५७२ कोटींचा खर्च अपेक्षित धरला आहे. तर, शासनाकडून २५० कोटींना मंजुरी मिळाली आहे.
ठाणे शहराची लोकसंख्या २० लाखाच्या पार पोहचली असुन नगरसेवकांची संख्याही १३१ झाली आहे. तरीही ठाणे महापालिकेचा कारभार ३९ वर्ष जुन्या इमारतीतुन सुरू आहे. ठामपा मुख्यालयाची इमारत जीर्ण बनली असुन कामाचा व कागदपत्रांचा व्याप वाढल्याने नस्ती ठेवण्यासही जागा अपुरी पडत आहे.तेव्हा, दुरवस्था बनलेल्या ठामपा मुख्यालयाचा मेकओव्हर करण्याची अथवा ठाणे शहरातील एखाद्या भूखंडावर नविन मुख्यालय उभारण्याची मागणी होत होती. याबाबतचे वृत्त सर्वप्रथम दै. मुंबई तरुण भारत ने प्रकाशित केले होते.
ठाणे महापालिका क्षेत्रातील रेमंड उद्योग समुहाच्या ४ एकराच्या सुविधा भुखंडावर टीडीआरच्या मोबदल्यात महापालिकेची सुसज्ज बहुउद्देशीय इमारत पार्किगच्या सुविधेसह उभारण्यात येणार आहे.नव्या ३२ मजली भव्य इमारतीमध्ये प्रशासकीय विभागासह पार्किंगची व्यवस्था, उद्यान, महापूरूषांचा इतिहास दर्शवणारे भव्य दालन उपलब्ध असणार आहे. प्रशासकीय इमारत बांधण्यासाठी ५७२ कोटींचे नियोजन करण्यात आल्याची माहिती ठामपा अधिकाऱ्यांनी दिली.
ठाणे महापालिकेचे निर्मिती १९८२ साली झाली असली तरी महापालिकेचे मुख्यालय असलेली पाचपाखाडी येथील इमारत १ आक्टोंबर १९८५ साली उभारण्यात आली.तळघर अधिक चार मजली असलेली ही इमारत जीर्ण बनली असल्याने नविन मुख्यालय उभारण्याची आवश्यक्ता होती. ठाणे महापालिकेत एकुण ४० च्या आसपास विभाग असुन तळघरात स्थावर मालमत्ता, औषध भांडार, जकात, भांडारगृह,आयटी विभाग, संगणक कक्ष,विद्युत विभाग आणि भंगार कक्ष आहे.
शासनाच्या नविन आकृतीबंधानुसार महापालिकेत कर्मचारी - अधिकारी वाढले त्याचबरोबर फायली,नस्ती वाढल्या. पण जागाच अपुरी असल्याने हे सर्व बाड ठेवण्यास तसेच कर्मचारी- अधिकाऱ्याना बसण्यास जागा तुटपुंजी आहे. तरीही, गेल्या तीन वर्षात इमारतीच्या पुर्ननिर्माणाचा तसेच नविन जागेत स्थलांतराचा प्रश्न अद्यापपर्यत प्रलंबितच राहिला होता. मध्यंतरी तत्कालीन आयुक्त संजीव जयस्वाल यांनी, बाळकुम साकेत रस्त्यानजीक अद्ययावत ग्लोबल इम्पॅक्ट हब महापालिकेचा विचार करून उभारले होते.मात्र, कोविड काळात तेथे ग्लोबल हॉस्पिटल निर्माण केल्याने हा प्रस्ताव प्रलंबित होता.