सुशांतचंच घर का निवडलं? अदा शर्माने सांगितलं कारण, म्हणाली, “या घरात मला...”

 

 

 

मुंबई : अभिनेता सुशांत सिंग राजपूत याच्या आकस्मिक निधनातून अजूनही हिंदी इंडस्ट्री सावरली नाही आहे. आजही अनेक कारणांमुळे तो चर्चेत असतो आणि त्याच्याविषयी बोललं जातं. नुकतचं अभिनेत्री अदा शर्मा त्याच्या बांद्रातील घरात भाडेकरु म्हणून राहात आहे. तिने सुशांत सिंग राजपूतचेच घर का निवडले याबद्दल खुलासा केला आहे. अदा शर्मा चार महिन्यांपूर्वीच सुशांतच्या घरी शिफ्ट झाली असून सध्या ती तिथे पुर्णपणे सेटल झाली आहे.

 

अदा शर्माने नुकतीच 'बॉम्बे टाइम्स'ला मुलाखत दिली. यावेळी सुशांतच्या फ्लॅटवर गेल्यानंतर तिला कसे वाटले हे तिने सांगितले. अदा म्हणाली की, 'मी चार महिन्यांपूर्वी या फ्लॅटमध्ये शिफ्ट झाले. पण 'बस्तर' आणि त्यानंतर 'द केरला स्टोरी'च्या ओटीटी प्रदर्शनात मी व्यस्त होते. त्यानंतर मी काही काळ मथुरेच्या हत्ती अभयारण्यात घालवला. आता मला सुट्टी मिळाली आणि मग मी इथेच स्थायिक झाले”. हेच घर का? या प्रश्नाचे उत्तर देताना ती म्हणाली, “आतापर्यंत मी पाली हिल (वांद्रे) येथे फक्त एकाच घरात राहिले होते. तिथून बाहेर पडण्याची ही पहिलीच वेळ आहे. मी या जागेबद्दल खूप संवेदनशील आहे आणि हे ठिकाण मला सकारात्मक व्हायब्स देते. केरळ आणि मुंबईतील आमची घरे झाडांनी वेढलेले आहे. आम्ही पक्ष्यांना खायला घालतो. त्यामुळे, मला घरासमोर सुंदर दृश्य असेल आणि पक्ष्यांना खायला घालायला पुरेशी जागा हवी होती”.

 

पुढे ती म्हणाली की, “मी कधीही लोकांची पर्वा केली नाही आणि नेहमी माझ्या मनाचे ऐकले. त्यामुळे सुशांत सिंह राजपूतच्या फ्लॅटमध्ये शिफ्ट होण्याबाबत माझ्या मनात कोणतीही शंका नव्हती”. अदाने सुशांतचं घर ५ वर्षांसाठी भाड्याने घेतले असून ऑक्टोबर २०२३ मध्ये भाडेतत्त्वाचा करार केला गेला होता.