तृणमूलकडून ईदसाठी लुंगी आणि नमाजी टोपीचे वाटप; निवडणूक आयोगाकडे तक्रार दाखल!

नवी दिल्ली : लोकसभा निवडणुक २०२४ ची अधिसूचना प्रसिद्ध झाल्यानंतर देशभरात निवडणूक आचारसंहिता लागू झाली आहे. दरम्यान, पश्चिम बंगालमधील एक व्हिडिओ सोशल मीडियावर व्हायरल होत आहे. या व्हायरल व्हिडिओमध्ये लोक तृणमूल काँग्रेसच्या बॅनरसमोर आणि ममता बॅनर्जींच्या फोटोसमोर लुंगी, नमाजी टोप्या आणि साड्यांचे वाटप करताना दिसत आहेत. भाजपच्या राज्य कमिटीने दि. ५ एप्रिल २०२४ रोजी निवडणूक आयोगाकडे याबाबत तक्रार केली असून कारवाईची मागणी केली आहे.

 

व्हायरल होत असलेला व्हिडिओ ३४ सेकंदांचा आहे. पश्चिम बंगाल भाजपचे मीडिया सह-प्रभारी किया घोष यांनी हा व्हिडिओ शेअर केला आहे. रघुनाथपूर हे बांकुरा लोकसभा मतदारसंघात येत असल्याचे त्यांनी या व्हिडिओचे वर्णन केले आहे. तृणमूल काँग्रेस ईदच्या सणामध्ये भेटवस्तूंचे वाटप करत असल्याचा आरोप किया घोष यांनी केला आहे. या भेटवस्तूंवर ममता आणि अभिषेक बॅनर्जी यांची छायाचित्रे छापण्यात आलेत. किया घोष म्हणाले की, या भेटवस्तू त्याच टीएमसी नेते अनुप चक्रवर्ती यांच्या मतदारसंघात वितरित केल्या जात आहेत, ज्यांनी काही दिवसांपूर्वी सांगितले होते की त्यांचा पक्ष पश्चिम बंगालमध्ये नामशेष होण्याच्या मार्गावर आहे.