मुंबई : “महायुतीच्या सर्व उमेदवारांना निवडून द्या आणि मुंबईत शपथविधीची तयारी करा,” असे आवाहन पंतप्रधान नरेंद्र मोदी ( Narendra Modi ) यांनी मुंबईकरांना केले. दादर येथील छत्रपती शिवाजी महाराज पार्क मैदानात गुरुवार, १४ नोव्हेंबर रोजी पंतप्रधान नरेंद्र मोदी यांची महायुतीच्या उमेदवारांच्या प्रचारासाठी भव्य सभा पार पडली. यावेळी मुख्यमंत्री एकनाथ शिंदे, उपमुख्यमंत्री देवेंद्र फडणवीस, सामाजिक न्यायमंत्री रामदास आठवले, कॅबिनेटमंत्री मंगल प्रभात लोढा, मुंबई भाजपचे अध्यक्ष आशिष शेलार यांच्यासह अनेक नेते उपस्थित होते.

यावेळी बोलताना पंतप्रधान नरेंद्र मोदी म्हणाले की, “महाराष्ट्रात अनेक संत आणि विद्वानांनी समाजाला दिशा देण्याचे काम केले. आज एकीकडे महायुतीची विचारधारा य परंपरेचा गौरव करते, तर दुसरीकडे महविकास आघाडीचे लोक वारंवार महाराष्ट्राच्या गौरवाचा अवमान करत आहे. ते तुष्टीकरणाचे गुलाम बनले आहेत. त्यांनी राम मंदिराला विरोध केला, मते मिळवण्यासाठी ‘भगवा आतंकवाद’सारखा शब्द आणला, वीर सावरकरांचा अपमान करतात आणि काश्मीरमध्ये ‘कलम ३७०’ परत आणण्यासाठी प्रस्ताव परित करतात. राजकारणात एकमेकांवर आरोप प्रत्यारोप करणे ठीक आहे. परंतु, ज्यावेळी विकासाची वेळ येते, तेव्हा प्रत्येकाने देशाला कायम आपल्या पक्षाच्या वर ठेवले पाहिजे. भाजप आणि महायुतीचा हा मंत्र आहे. परंतु, महाविकास आघाडीच्या लोकांसाठी देशापेक्षा त्यांचा पक्ष मोठा आहे. त्यामुळे भारताच्या प्रत्येक विकासावर ते प्रश्नचिन्ह उपस्थित करतात,” असा घणाघात पंतप्रधानांनी केला.

मी तुमच्या स्वप्नांसाठी जगतो

पंतप्रधान मोदी पुढे म्हणाले की, “मुंबई हे स्वप्नांचे शहर आहे, तर महायुती स्वप्नांना साकार करणारी युती आहे. जनतेचे स्वप्न हाच आमचा संकल्प आहे. मी तुमच्या स्वप्नांसाठी जगतो आणि ते पूर्ण करण्याचे आश्वासन देतो. जगातील प्रत्येक देश आज आपल्या शहरांना आधुनिक बनवत आहेत. महायुतीने मुंबईसाठी हेच स्वप्न पाहिले आहे. आमचे सरकार मुंबईला कनेक्टिव्हिटीच्या प्रत्येक समस्येतून मुक्ती देऊ इच्छितो,” असे आश्वासन त्यांनी दिले.