चांद्रयान-३ पोहोचले चंद्राच्या आणखी जवळ! वाचा सविस्तर

14-Aug-2023

Total Views | 146

मुंबई : भारताने पाठवलेले चांद्रयान-३ आता चंद्राच्या आणखी जवळ पोहोचले असल्याची माहिती समोर आली आहे. आता चांद्रयान-३ ची चंद्रापासूनची कक्षा १५० किमी X १७७ किमी इतकी करण्यात आली आहे. श्रीहरिकोटा येथून १४ जुलै रोजी चांद्रयान-३ प्रक्षेपण करण्यात आले होते.

आकाशात झेपावलेल्या चांद्रयान-३ ला एक महिना पुर्ण झाला असून २३ ऑगस्ट रोजी चांद्रयान चंद्राच्या दक्षिण ध्रुवावर सॉफ्ट लॅंडींग करणार आहे. चांद्रयान-३ ने ५ ऑगस्ट रोजी प्रथमच चंद्राच्या कक्षेत प्रवेश केला. त्यानंतर तीन वेळा आपली कक्षा बदलून ते चंद्राच्या जवळ आले आहे. आता चांद्रयान-३ लंबवर्तुळाकार कक्षेतून वर्तुळाकार कक्षेत येऊ लागले आहे.

चांद्रयान-३ ची चंद्रापासूनची कक्षा १५० किमी X १७७ किमी इतकी करण्यात आली असून १६ ऑगस्ट रोजी सकाळी ८.३० वाजता आणखी एकदा कक्षा बदलली जाणार असल्याची माहिती इस्त्रोने दिली आहे. त्यानंतर इस्रो चांद्रयान-३ चे प्रोपल्शन मॉड्यूल लँडरपासून वेगळे करेल आणि २३ ऑगस्ट रोजी लँडर चंद्राच्या पृष्ठभागावर उतरेल.

इस्रोला चांद्रयान-२ मोहिमेत सॉफ्ट लँडिंगमध्ये अपयश आले होते. त्यामुळे आता चांद्रयान-३ कडे सर्वांचे लक्ष लागले असून ही मोहीम यशस्वी झाल्यास चंद्राच्या भूमीवर उतरणारा भारत हा जगातील चौथा देश ठरणार आहे.