बालासोर रेल्वे अपघात हा घातपात असू शकतो; माजी सनदी अधिकारी, सैन्याधिकाऱ्यांचे पंतप्रधान मोदींना पत्र

नवी दिल्ली : भारतीय रेल्वे माल आणि मानव यांच्या वाहतुकीची जीवनरेखा आहे. देशाच्या प्रगतीला विरोध करणार्‍या शक्तींना नेटवर्क विस्कळीत व्हावे आणि देशात अराजक निर्माण व्हावे, असे वाटते. या पार्श्वभूमीवर बालासोर येथील रेल्वे अपघात हा घातपात असू शकतो, असा संशय देशातील माजी वरिष्ठ अधिकारी आणि सैन्याधिकाऱ्यांनी पंतप्रधान नरेंद्र मोदी यांनी पत्र लिहून व्यक्त केला आहे. उत्तर प्रदेशचे माजी पोलिस महासंचालक विक्रम सिंह, जम्मू – काश्मीरचे माजी पोलिस महासंचालक एस. पी. वैद, रॉचे माजी प्रमुख संजीव त्रिपाठी यांच्यासह २७० भारतीय प्रशासकीय सेवा, भारतीय पोलिस सेवा, भारतीय विदेश सेवा, उच्च न्यायालयांचे माजी मुख्य न्यायाधीश आणि न्यायधीश, भारतीय लष्कर, नौदल आणि हवाईदलातील निवृत्त अधिकाऱ्यांनी पंतप्रधान नरेंद्र मोदी यांना पत्र लिहून बालासोर अपघाताविषयी संशय व्यक्त केला आहे.

पत्रात म्हटले आहे की, भारतीय रेल्वेचे वेगाने आधुनिकीकरण होत असताना ओदिशामधील बालासोर येथे घडलेल्या अपघाताने आमच्या मनात शंका निर्माण झाल्या आहेत. प्रकरणाचा तपास अद्याप सुरू असला तरी प्राथमिक अहवालांनुसार, रूळावरून घसरण्याचे कारण जाणूनबुजून मानवी हस्तक्षेप, दहशतवादी संघटनांच्या इशार्‍यावर तोडफोडीचे स्पष्ट प्रकरण असू शकते असा संशय घेण्याची कारणे आहेत. जम्मू आणि काश्मीर आणि ईशान्येकडील बंडखोरीविरोधी काम केलेल्या आमच्यापैकी काहींनी रेल्वे नेटवर्कच्या सुरळीत चालण्यावर अशा प्रकारच्या तोडफोडीच्या परिस्थितीचा सामना केला आहे. या असुरक्षित भागात रेल्वेचे जाळे विस्कळीत करण्यासाठी दहशतवाद्यांकडून असेच सुनियोजित प्रयत्न झाले होते, ज्यामुळे तोडफोड, रुळावरून घसरले आणि नागरिकांचे बळी गेले होते. प्रामुख्याने पठाणकोट ते जम्मू पर्यंतच्या रेल्वेमार्गावर १९९० आणि २००० च्या दशकाच्या सुरुवातीस असे अनेक हल्ले झाले होते. मात्र, चोख बंदोबस्त केल्यानंतर असे हल्ले थांबल्याचे पत्रात म्हटले आहे.

भारतीय रेल्वे माल आणि मानव यांच्या वाहतुकीची जीवनरेखा आहे. देशाच्या प्रगतीला विरोध करणार्‍या शक्तींना नेटवर्क विस्कळीत व्हावे आणि मोठ्या मानवी शोकांतिकेसह आपत्ती निर्माण व्हावी असे वाटते. बेकायदेशीर स्थलांतरितांसह रेल्वे रुळांच्या बाजूने बेकायदेशीर झोपडपट्ट्या काढून टाकणे आणि रेल्वे ट्रॅकच्या सुरक्षिततेसाठी कठोर उपाययोजना करणे अत्यावश्यक आहे. देशाच्या प्रगतीला विरोध करणार्‍या शक्तींना नेटवर्क विस्कळीत व्हावे आणि देशात अराजक निर्माण व्हावे, असे वाटणाऱ्या शक्तींचा त्यामुळे बिमोड करणे शक्य आहे. त्याचवेळी सीबीआय तपासामध्ये आंतरराष्ट्रीय ख्यातीच्या भारतीय रेल्वे व्यवस्थेस लक्ष्य करणाऱ्या गुन्हेगारांना शासन होईल, असा विश्वासही या माजी अधिकाऱ्यांनी व्यक्त केला आहे.