कोरोनाविनाच आमदार क्वारंटाईन !

 

 

 

ठाणे : ठाण्यातील ओवळा-माजिवड्याचे शिवसेनेचे आमदार प्रताप सरनाईक यांच्यावर ईडीने (अंमलबजावणी संचलनालय ) छापा टाकल्यानंतर त्यांच्यावर चौकशीची टांगती तलवार कायम आहे. त्यामुळे, गेल्या काही महिन्यांपासुन आमदार सरनाईक गायब असल्याच्या चर्चाना पेव फुटले आहे. आता तर, ओवळा-माजिवडा मतदार संघातील मतदारांनी "कोरोना न होताही आमदार क्वारंटाईन". अशा आशयाचे फलक जागोजागी लावल्याचे समोर आले आहे. आधीच विविध आरोपांनी अडचणीत सापडलेल्या आमदारांना सामान्य मतदारांच्या फलकबाजीचा 'प्र'ताप सोसावा लागत आहे. दुसरीकडे शिवसेनेतही हे आमदार एकाकी पडल्याचे दिसुन येत आहे.

 

 

 

शिवसेनेचे प्रवक्ते ठाण्यातील ओवळा माजिवडा विधानसभा मतदार संघाचे आमदार प्रताप सरनाईक यांच्या ठाण्यातील तसेच अन्य ठिकाणच्या घरावर आणि कार्यालयावर ईडीने (अंमलबजावणी संचलनालय) छापेमारी करून शोध मोहीम सुरु केल्याने सरनाईक कुटुंबासमोरील अडचणी वाढल्या आहेत. यापुर्वी नोव्हेबर २०२० मध्ये ईडीच्या चौकशीचा ससेमिरा टाळण्याच्या प्रयत्नात सरनाईक कुटुंब क्वारंटाईन झाले होते. तर त्यांच्या सूनबाई खाजगी रुग्णालयात दाखल झाल्या होत्या. प्रताप सरनाईक यांच्या नगरसेविका पत्नी परिषा सरनाईक यादेखील तेव्हा पासुन मानसिक तणावाखाली असल्याचे समजते. अशा परिस्थितीत आता सरनाईक यांच्या मतदारसंघात लागलेले 'फलक' चर्चेचा विषय बनले आहेत. "कोरोना न होताही आमदार झाले क्वारंटाईन" अशी उपरोधीक टिप्पणी केलेले फलक सामान्य मतदाराने लावल्याने आमदार सरनाईक टिकेचे धनी होत आहेत.

 

 

 

एकीकडे कोरोना काळात सर्व लोकप्रतिनिधी आपआपल्या मतदार संघात ठाण मांडुन जनतेची मदत करीत असताना ओवळा-माजिवड्याचे शिवसेना आमदार गायब असल्याच्या तक्रारी येथील नागरीक करीत आहेत. अनेक कोरोना रुग्ण व त्यांच्या नातेवाईकांची धावपळ होत असताना सेनेचे हे आमदार कोणत्या बिळात लपले आहेत. अशी विचारणा मतदार करीत आहेत. दरम्यान, यासंदर्भात प्रतिक्रियेसाठी आमदार प्रताप सरनाईक यांना संपर्क साधला असता त्यांचा मोबाईल स्विच ऑफ आढळला.