पालिका प्रकल्प विकासकामे रखडली

मुंबई : इमारती आणि प्रकल्प उभारण्याची कौशल्याची कामे अभियंत्यांकडे देण्यात येतात. मात्र मुंबई महापालिकेत कोरोनाग्रस्त भागातील इमारती सील करण्याची कामे अभियंत्यांकडे देण्यात आली आहेत. त्यामुळे विकासकामे रखडली आहेत. मुंबई महापालिकेच्या सुमारे ६०० अभियंत्यांना इमारती सील करण्याचे काम देण्यात आले आहे.

 

कोरोनाचा वाढत असल्याचे लक्षात येताच पालिकेच्या अभियंत्यांना कोरोनावर नियंत्रण आणण्याच्या बिगर अभियांत्रिकी कामाला लावले आहे. हातातली कामे सोडून कोरोनाचा रुग्ण आढळलेल्या इमारती सील करणे, रुग्ण शोधणे, कंटेन्मेंट झोन तयार करणे, रुग्णांचे अहवाल तयार करणे, बेघर आणि मजुरांना अन्न वाटप करणे आदी कामे त्यांना करावी लागत आहेत. पालिकेच्या अभियांत्रिकी, उपप्रमुख अभियंता, वास्तुविशारद, आर्किटेक्ट आदी विभागाचे सुमारे ६०० अभियंते कोरोनाच्या कामासाठी जुंपण्यात आले आहेत.