काश्मीरमुद्यावरून भारताला विरोध करणाऱ्या लेबर पक्षाचा ब्रिटनमध्ये पराभव

ब्रिटन : सार्वत्रिक निवडणुकांचे निकाल शुक्रवारी ब्रिटनमध्ये येऊ लागले आहेत. ब्रिटनचे पंतप्रधान बोरिस जॉनसनच्या कॉन्झर्व्हेटिव्ह पार्टीने बहुमताचा आकडा (३२६)गाठला. ब्रिटनमधील निवडणुकांचे प्राथमिक निकाल येण्यास सुरुवात झाली आहे. तथापि, विरोधी लेबर पार्टी देखील २०० जागा जिंकण्याच्या जवळ आहे. निवडणुकांच्या विजयाबद्दल पंतप्रधान नरेंद्र मोदी यांनी कॉन्झर्व्हेटिव्ह पक्षाचे अभिनंदन केले. पंतप्रधान मोदींनी ट्वीट केले की," पंतप्रधान बोरिस जॉन्सन हे बहुमताने पुन्हा निवडून आल्याबद्दल अभिनंदन. त्यांना शुभेच्छा देतो आणि भारत-ब्रिटन संबंध अधिक दृढ होण्यासाठी एकत्र काम करण्याची अपेक्षा करतो."

एक्झिट पोलमध्ये कंझर्व्हेटिव्ह पक्षाला ३६८ जागा

एक्झिट पोलमध्ये एकूण ६५० जागा असणाऱ्या संसदेत कॉन्झर्व्हेटिव्ह पक्षाला ३६८ जागा, लेबर पार्टी १९१ जागा, स्कॉटिश नॅशनल पार्टी (एसएनपी), ५५ , लिबरल डेमोक्रॅट्स यांना १३ जागा मिळतील असा अंदाज होता.

कॉन्झर्व्हेटिव्ह पक्षाच्या प्रीती पटेल म्हणाल्या 'निवडणूक जिंकल्यानंतर ब्रेग्झिट मुद्दा संपवू.'

एक्झिट पोलच्या निकालाला उत्तर देताना जॉन्सनच्या मागील मंत्रिमंडळातील भारतीय वंशाच्या प्रिती पटेल म्हणाल्या की, "हिवाळ्याच्या हंगामात झालेली ही एक कठीण निवडणूक होती. कॉन्झर्व्हेटिव्ह पक्षाला बहुमत मिळावे यासाठी हा काळ योग्य आहे. निवडणुकीच्या सभांसाठी आम्हाला खूप मेहनत घ्यावी लागली. एक्झिट पोलचे निकाल आनंददायी आहेत." पटेल म्हणाले की," जिंकल्यानंतर, ब्रेक्झिट करार संपविणारे सरकार पहिलेच काम असेल. हे ख्रिसमसच्या आधी देखील होऊ शकते."