पेट्रोल पंपावर सीएनजी स्फोट; ३ जखमी

मुंबई: कांदिवली येथे मिलाप पेट्रोल पंपावर रिक्षामध्ये सीएनजी गॅस भरताना अचानक स्फोट होऊन ३ जण गंभीर जखमी झाले आहेत.यामध्ये दोन रिक्षाचालकांचा समावेश आहे. सकाळी साडे नऊच्या सुमारास कांदिवली पश्चिमेतील मिलाप पेट्रोल पंपावर ही घटना घडली. रिक्षामध्ये सीएनजी गॅस भरण्यासाठी या पेट्रोल पंपावर नेहमीप्रमाणे रांग लागली होती. यावेळी एका रिक्षात गॅस भरताना अचानक स्फोट झाला. त्यात ३ जण जखमी झाले.

या स्फोटामुळे रिक्षाचा अक्षरश: चक्काचूर झाला असून पेट्रोल पंपाचीही मोठ्याप्रमाणावर नासधूस झाली आहे. या घटनेनंतर पेट्रोल पंपावरील पेट्रोल आणि डिझेलचे सेक्शन बंद करण्यात आले आहे. दरम्यान, पोलीस आणि अग्निशमन दलाच्या जवानांनी घटनास्थळी धाव घेतली असून अधिक तपास करत आहेत. मात्र रिक्षामध्ये प्रमाणापेक्षा अधिक गॅस भरण्यात आल्यानेच हा स्फोट झाल्याचे सूत्रांनी सांगितले.

माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/