'इंडी' आघाडी फुटणार? काँग्रेस नेत्यांचा आम आदमी पक्षाविरोधात आक्रमक पवित्रा!

18-Sep-2023

Total Views | 47

मुंबई : विरोधी पक्षांच्या आघाडीमध्ये अजूनही सर्व गोष्टींवर एकमत होताना दिसत नाही. विरोधी आघाडीतील सर्वात मोठा पक्ष असलेल्या काँग्रेसच्या दिल्लीतील नेत्यांचा आम आदमी पक्षाला विरोध कायम आहे. दिल्लीतील काँग्रेस नेत्यांनी लोकसभेच्या जागावाटपाविषयी कोणताही निर्णय घेण्याची घाई करू नका, अशी विनंती हायकमांडला केली आहे.

आगामी पाच राज्यांतील विधानसभा निवडणुकांच्या निकालानंतर जागावाटप करण्याची भूमिका काँग्रेस पक्ष घेऊ शकतो. त्यामुळे विरोधी पक्षांच्या आघाडीत सर्व काही ठीक नसल्याच्या चर्चा राजकीय वर्तुळात चालू आहेत. विरोधी पक्षांच्या आघाडीमुळे काँग्रेसला जागा वाटपात कमी जागा मिळण्याची शक्यता आहे.

त्यामुळे काँग्रेसच्या नेत्यांमध्ये अस्वस्थता पसरली आहे. दिल्लीमध्ये काँग्रेसला साफ करण्यात आम आदमी पक्षाने मोठी भूमिका बजावली होती. अरविंद केजरीवाल यांनी काँग्रेसच्या अनेक नेत्यांवर भ्रष्टाचाराचे आरोप केले होते. त्यामुळे दिल्लीतील काँग्रेसच्या स्थानिक नेत्यांमध्ये अरविंद केजरीवाल यांच्याविषयी रोष आहे.