नार्को दहशतवादाची इकोसिस्टीम नष्ट करणार : अमित शाह

नवी दिल्ली : “नार्को दहशतवादाची इकोसिस्टीम नष्ट करणार,” असे सूतोवाच केंद्रीय गृह आणि सहकारमंत्री अमित शाह ( Amit Shah ) यांनी केले. शनिवार, दि. ११ जानेवारी रोजी नवी दिल्ली येथे आयोजित केलेल्या ‘ड्रग्ज तस्करी आणि राष्ट्रीय सुरक्षा’ या विषयावरील प्रादेशिक परिषदेचे अध्यक्षस्थान शाह यांनी भूषविले. त्यावेळी ते बोलत होते. या कार्यक्रमात केंद्रीय गृहमंत्र्यांनी ड्रग्ज डिस्ट्रक्शन पंधरवड्याचा शुभारंभ, एनसीबीच्या भोपाळ झोनल युनिटच्या नवीन कार्यालय संकुलाचे उद्घाटन आणि सर्व राज्ये आणि केंद्रशासित प्रदेशांमध्ये मानस-२ हेल्पलाईनचा विस्तारदेखील केला.

मंत्री अमित शाह यावेळी म्हणाले की, “अशा प्रादेशिक परिषदांनी आपल्या ड्रग्जविरुद्धच्या लढाईला एक मजबूत पाया दिला आहे आणि अशा प्रयत्नांमुळे, या समस्येविरुद्धची आपली मोहीम खूप मजबूत झाली आहे. २०२४ साली देशभरातील पोलीस दल आणि एनसीबीने १६ हजार, ९१४ कोटी रुपयांचे ड्रग्ज जप्त करण्यात यश मिळवले आहे, जो स्वातंत्र्यानंतरचा सर्वात मोठा आकडा आहे, यावरून असे दिसून येते की आमच्या प्रयत्नांना यश मिळत आहे,” असे ते म्हणाले. आपल्यासमोरील आव्हाने लक्षात घेता, आपल्याला अधिक ताकद, तीव्रता, सूक्ष्म नियोजन आणि वेळेवर धोरणे तयार करून सतत देखरेखीसह पुढे जावे लागेल, तरच आपण या लढाईत यशस्वी होऊ, असे केंद्रीय गृहमंत्री अमित शाह यांनी सांगितले.

ते पुढे म्हणाले की, “पंतप्रधान नरेंद्र मोदी यांचे २०४७ सालापर्यंत पूर्ण विकसित भारत निर्माण करण्याचे ध्येय साध्य करणे हे ड्रग्जमुक्त भारत साध्य करण्यासाठी आवश्यक आहे. ड्रग्जविरुद्धच्या लढाईत केंद्र सरकार आणि राज्य सरकारला एकाच व्यासपीठावर एकत्र यावे लागेल आणि संबंधित विभागांना या दुष्टतेचा पराभव करण्यासाठी पूर्ण समर्पणाने आणि कठोर परिश्रमाने काम करावे लागेल. आम्ही नार्को दहशतीची संपूर्ण परिसंस्था नष्ट करण्याचा दृढनिश्चय केला,” असे त्यांनी नमूद केले.