मुंबई पदवीधर मतदारसंघात किरण शेलार विरुद्ध अनिल परब लढत

मुंबई : बहुचर्चित मुंबई पदवीधर मतदारसंघातून शिवसेनेच्या डॉ. दीपक सावंत यांनी माघार घेतल्यामुळे भाजप महायुतीचे उमेदवार किरण रवींद्र शेलार विरुद्ध उबाठा गटाचे अनिल परब असा सामना रंगणार आहे. विधानपरिषदेच्या मुंबई पदवीधर, कोकण विभाग पदवीधर, नाशिक विभाग शिक्षक, तसेच मुंबई शिक्षक मतदारसंघ अशा चार जागांसाठी उमेदवारीअर्ज मागे घेण्याचा बुधवार, दि. १२ जून रोजी शेवटचा दिवस होता. अखेरच्या दिवशी मुंबई पदवीधरमधून दोनजणांनी माघार घेतली. या मतदारसंघात एकूण आठजण आखाड्यात असले, तरी मुख्य लढत ही किरण शेलार आणि अनिल परब यांच्यात होणार आहे.