आचार्य अत्रे जयंती निमित्त ठाणे महापालिकेची ‘विचारमंथन व्याख्यानमाला’

ठाणे : मराठीतील अष्टपैलू साहित्यिक, शिक्षणतज्ज्ञ, चित्रपट निर्माते-दिग्दर्शक, वृत्तपत्रकार, वक्ते आणि नेते आचार्य प्रल्हाद केशव अत्रे यांच्या जयंतीच्या निमित्ताने ज्येष्ठ पत्रकार श्रीकांत बोजेवार यांचे व्याख्यान आयोजित करण्यात आले आहे. अत्रे यांच्या जीवनपटाच्या लिखाणाच्या निमित्ताने बोजेवार यांनी अत्रे यांच्या समग्र साहित्याचा, व्यक्तिमत्वाचा सखोल अभ्यास केला आहे. ठाणे महापालिकेच्या ‘विचारमंथन व्याख्यानमाले’तील हे सातवे पुष्प असून हे ‘आचार्य अत्रे यांचे व्यक्तिमत्व आणि विचार’, याविषयावरील हे व्याख्यान शनिवार, १२ ऑगस्ट रोजी सायंकाळी ६ वाजता काशिनाथ घाणेकर नाट्यगृहाच्या मिनी थिएटरमध्ये होणार आहे.

 

हे व्याख्यान सगळ्यांसाठी खुले आहे. महनीय व्यक्तींचे कार्य व माहिती कळावी, त्यांच्या विचारांचा जागर व्हावा यासाठी ‘विचारमंथन व्याख्यानमाले’त मान्यवर व्यक्तींचे व्याख्यान आयोजित केले जाते. या व्याख्यानमालेतील हे सातवे पुष्प असून ठाणेकरांनी या संधीचा लाभ घ्यावा, असे आवाहन ठाणे महापालिका आयुक्त अभिजीत बांगर यांनी केले आहे.