भोसरीत ‘व्हीजन-२०२०’च्या स्वप्नपूर्तीचा आनंदोत्सव; पंतप्रधानांच्या हस्ते लोकार्पण अन्‌ भूमिपूजन

दरम्यान, पंतप्रधान मोदींच्या दौऱ्यात पुणे आणि पिंपरी-चिंचवडमधील सुमारे १ हजार ९७० कोटी रुपयांच्या प्रकल्पांचे भूमिपूजन आणि उद्घाटन झाले. यापैकी सुमारे १ हजार ७२० कोटी रुपयांचे प्रकल्प पिंपरी-चिंचवड शहरातील आहेत. त्यामुळे मोदींच्या दौऱ्यात भोसरी विधानसभा मतदार संघातील प्रकल्पांचा बोलबाला दिसला. तसेच, बोऱ्हाडेवाडी येथील प्रधानमंत्री आवास योजनेतील प्रकल्पाअंतर्गत १२८८ घरांचा चावीवाटप कार्यक्रम झाला. यावेळी माजी नगरसेविका सारिका बोऱ्हाडे, नितीन बोऱ्हाडे, मंगेश हिंगणे यांच्यासह स्थानिक नागरिक आणि लाभार्थी उपस्थित होते.

व्हीजन- २०२०’ या महत्त्वाकांक्षी उपक्रमांतर्गत ‘वेस्ट टू एनर्जी’ अर्थात कचऱ्यापासून वीजनिर्मिती हा प्रकल्प हाती घेतला होता. २०१८ मध्ये प्रकल्पाचे काम सुरू झाले. हा प्रकल्प आता कार्यान्वयीत झाला असून, त्याद्वारे प्रतिदिन १ हजार टन कचऱ्यावर प्रक्रिया आणि १४ मेगावॅट वीजनिर्मिती होणार आहे. त्यामुळे ‘व्हीजन-२०२०’ मधील आश्वासनाची स्वप्नपूर्ती झाल्याचा आनंद स्थानिक नागरिकांनी प्रकल्पाच्या ठिकाणी केला.

पुणे व पिंपरी-चिंचवड महापालिका, पुणे प्रदेश महानगर विकास प्राधिकरण (पीएमआरडीए) यांच्यामार्फत पंतप्रधान आवास योजना, वेस्ट टू एनर्जी अशा विविध प्रकल्पांचे लोकार्पण व भूमिपूजन शिवाजीनगर येथील पोलीस परेड ग्राउंडवर झालेल्या शानदार कार्यक्रमात देशाचे पंतप्रधान नरेंद्रजी मोदी यांच्या हस्ते ऑनलाईन पद्धतीने करण्यात आले. यावेळी राज्यपाल रमेश बैस, मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार, पालकमंत्री चंद्रकांत पाटील यांच्यासह मान्यवर उपस्थित होते.

‘व्हीजन-२०२०’ अंतर्गत हाती घेतलेला ‘वेस्ट टू एनर्जी’ आणि प्रधानमंत्री आवास योजनेतील प्रकल्प पूर्ण झाला. देशाचे लोकप्रिय पंतप्रधान नरेंद्र मोदी यांच्या हस्ते लाभार्थींना चावी वाटप झाले. तसेच, पिंपरी-चिंचवडचा कचरा प्रश्न सोडवण्यासाठी कचऱ्यापासून वीज निर्मिती करणारा प्रकल्प हा सर्वोत्तम आहे, अशा शब्दांत पंतप्रधानांनी कौतूक केले. ही निश्चितच पिंपरी-चिंचवडकरांसाठी अभिमानाची बाब आहे. या कार्यक्रमाला स्वत: उपस्थित राहता आले, त्याचा अभिमान वाटतो. या पुढील काळात प्रस्तावित प्रकल्प पूर्णत्वास नेऊन शहराला नव्या उंचीवर नेण्यासाठी प्रामाणिक काम करीत राहणार आहे. -महेश लांडगे, आमदार, भोसरी विधानसभा, भाजपा.