मुंबई : मराठी चित्रपटांचे आशय-विषय, विषयांची मांडणी व त्यानुसार कलाकारांची निवड ही इतर भाषिक चित्रपटांच्या तुलनेने बदलत आहेच. अशात हिंदी चित्रपटांच्या पाठोपाठ मराठी चित्रपटांचेही परदेशात चित्रिकरण मोठ्या प्रमाणात होत आहे. मराठी चित्रपटसृष्टीत अनेक विषयांवर आधारित चित्रपटांना प्रेक्षक भरघोस प्रतिसाद देतात. त्यातील एक महत्वाचा आणि जिव्हाळ्याचा विषय म्हणजे मैत्री. ‘दुनियादारी’, ‘फ्रेंड्स’, ‘क्लासमेट’ अशा मैत्रीवर आधारित चित्रपटांपाठोपाठ आता ‘मुसाफिरा’ हा आणखी एक मैत्रीची नवी व्याख्या सांगणारा चित्रपट प्रेक्षकांच्या भेटीस येणार आहे. मराठी चित्रपट म्हटलं की बजेटचा विषय प्रामुख्याने उभा राहतोच. मात्र, या चित्रपटाने या विषयालाही मोडून काढत स्कॉटिश हायलँड्सच्या आयल ऑफ स्कायवर चित्रित झालेला हा पहिला भारतीय चित्रपट ठरला आहे. यानिमित्तीने मराठी चित्रपटसृष्टीच्या शीरावर आणखी एक मानाचा तुरा लावला गेला आहे.
आनंद पंडित मोशन पिक्चर्स आणि पुष्कर जोग यांच्या 'व्हिक्टोरिया' या भयपटाने प्रेक्षकांना सुंदर स्कॉटलँडची सफर घडवल्यानंतर आता पुन्हा ही जोडी प्रेक्षकांचे मनोरंजन करण्यासाठी सज्ज झाली आहे. आनंद पंडित मोशन पिक्चर्स, गूझबम्प्स एंटरटेन्मेंट आणि नितीन वैद्य प्रॉडक्शनच्या 'मुसाफिरा' या चित्रपटाची घोषणा करण्यात आली असून अभिनेता आणि निर्माता म्हणून काम केल्यानंतर आता पुष्कर जोग 'मुसाफिरा'च्या माध्यमातून पुन्हा एकदा दिग्दर्शकाच्या भूमिकेत दिसणार आहे. या चित्रपटात पुष्कर जोग, पूजा सावंत, पुष्कराज चिरपुटकर, भोजपुरी स्टार स्मृती सिन्हा, दिशा परदेशी यांच्या प्रमुख भूमिका असणार आहेत.
मैत्री हा विषय कायमच प्रेक्षकांची मने जिंकत आला आहे. 'मुसाफिरा' या चित्रपटाचे कथानकही मैत्रीबद्दस असून मैत्रीची नवीन परिभाषा यात अनुभवायला मिळणार आहे. 'मुसाफिरा'बद्दल दिग्दर्शक पुष्कर जोग म्हणतो, ''अलीकडे मराठी चित्रपटांनी चित्रीकरणासाठी भारताची सीमा ओलांडली आहे. त्यामुळे आता मराठी चित्रपटाचे परदेशात चित्रीकरण करणे नवीन नाही. मात्र एक पाऊल पुढे टाकत 'मुसाफिरा'ने मराठी सिनेसृष्टीत एक नवीन विक्रम प्रस्थपित केला आहे. निसर्गरम्य अशा स्कॉटिश हायलँड्सची सफर प्रेक्षकांची करमणूक द्विगुणित करेल हे नक्की. हा तरुणाईला आवडणारा विषय असला तरी हा एक कौटुंबिक आणि हृदयस्पर्शी चित्रपट आहे. 'मुसाफिरा'चे चित्रीकरण पूर्ण झाले असून या वर्षाच्या अखेरीस 'मुसाफिरा' चित्रपटगृहात प्रदर्शित होईल.''