नवी दिल्ली : देशाची जीवनवाहिनी समजल्या जाणाऱ्या रेल्वेसाठी अर्थसंकल्पामध्ये यंदा तब्बल २. ४० लाख कोटी रुपयांची तरतूद करण्यात आली आहे.

 

 

यंदाच्या अर्थसंकल्पामध्ये रेल्वेसाठी २०१३ – १४ च्या तुलनेत तब्बल ९ पट अधिक तरतूद करण्यात आल्याचे अर्थंमंत्री निर्मला सीतारामन यांनी सांगितले आहे. रेल्वेसाठी २.४० लाख कोटी रुपयांची तरतूद ही आतापर्यंतची सर्वोच्च असल्याचेही त्यांनी सांगितले आहे. यावेळी रेल्वे अर्थसंकल्पात रेल्वेचे अपूर्ण प्रकल्प पूर्ण करण्याबरोबरच नवीन पायाभूत सुविधा विकसित करण्यावरही भर देण्यात येणार आहे. हायस्पीड ट्रेन लवकरच कार्यान्वित करण्यावरही भर दिला जाणार आहे. नवे रेल्वेमार्ग बांधणे ट्रॅक, सेमी-हायस्पीड वंदे भारत गाड्यांची संख्या वाढवणे, हायड्रोजनवर चालणाऱ्या गाड्या तसेच अहमदाबाद-मुंबई बुलेट ट्रेन प्रकल्प पूर्ण करणे यासाठीही मोठ्या रकमेची तरतूद करण्यात आली आहे.

 

 

बंदरे, कोळसा, पोलाद, खत आणि अन्नधान्य क्षेत्रासाठी 100 वाहतूक पायाभूत सुविधा प्रकल्पांना प्राधान्याने पूर्ण केले जाणार आहेत. त्यासाठी 75,000 कोटी रुपयांची तरतूद करण्यात आली आहे त्यापैकी 15,000 कोटी रुपये खाजगी क्षेत्रातून येतील. प्रादेशिक हवाई संपर्क सुधारण्यासाठी 50 अतिरिक्त विमानतळ, हेलिपॅड, वॉटर एरोड्रोम आणि प्रगत लँडिंग ग्राउंड्सचा पुनर्विकास केला जाणार आहे.

 

 

भविष्याचा विचार करता देशातील शहरांचा विकास करण्यासाठी नागरी पायाभूत सुविधा विकास निधीची स्थापना करण्यात येणार असून त्यासाठी दरवर्षी १० हजार कोटी रुपयांची तरतूद करण्यात येणार आहे.

 

भविष्यातील शाश्वत शहरांचा विकास करण्यासाठी याअंतर्गत राज्यांना प्रोत्साहन देण्यात येणरा आहे. नियोजन सुधारणा आणि परिवर्तनासाठी कृती यासाठी जमीन संसाधनांचा कार्यक्षम वापर, शहरी पायाभूत सुविधांचा विकास संक्रमणाभिमुख विकासाला चालना देणे यास प्राधान्य देण्यात येणार आहे.