मुख्यमंत्र्यांआधीच फडणवीस पाहणी दौऱ्यासाठी कोकणात !

मुंबई : तौक्ते चक्रीवादळाचा कोकण किनारपट्टीला मोठा फटका बसला आहे. याच पार्श्वभूमीवर विरोधी पक्षनेते देवेंद्र फडणवीस तीन दिवसांचा कोकण दौरा करणार आहेत. त्यांच्यासोबत विधान परिषदेचे विरोधी पक्षनेते प्रवीण दरेकर असणार आहेत. विरोधी पक्षनेते कोकणातील नुकसानीची पाहणी दौऱ्यावर गेले मात्र मुख्यमंत्र्यांचं 'वर्क फ्रॉम होम' कधी संपणार ? असा सवाल विरोधकांकडून विचारला जात आहे? विरोधकांच्या टीकेनंतर मुख्यमंत्री शुक्रवारी कोकण दौऱ्यावर जाणार असल्याची माहिती मंत्री उदय सामंत यांनी दिली.

विरोधी पक्षनेते देवेंद्र फडणवीस रायगड, रत्नागिरी आणि सिंधुदुर्ग जिल्ह्यात तौक्ते चक्रीवादळामुळे मोठे नुकसान झाले आहे. वादळामुळे झालेल्या नुकसानाची पाहणी करण्यासाठी फडणवीस तीन दिवसीय कोकण दौऱ्यावर आहेत. देवेंद्र फडणवीस आज (बुधवार) रायगड, उद्या रत्नागिरी, तर परवा सिंधुदुर्ग जिल्ह्यात जातील. विरोधी पक्षांकडून टीका झाल्यानंतर मुख्यमंत्री उद्धव ठाकरेही कोकण दौऱ्यावर जाणार आहेत. येत्या शुक्रवारी मुख्यमंत्री उद्धव ठाकरे कोकणात जाणार असून तौक्ते वादळामुळे झालेल्या नुकसानीचा आढावा घेणार आहेत.

कोकणातील नुकसानीची पाहणी केल्यानतंर उदय सामंत यांनी येत्या दोन दिवसात मुख्यमंत्री उद्धव ठाकरेही कोकणात येऊन नुकसानीची पाहणी करणार असल्याची माहिती दिली. मुख्यमंत्र्यांचा हा दौरा दोन दिवसांचा असेल. मुख्यमंत्री उद्वव ठाकरे शुक्रवारी कोकणातील नुकसानीची पाहणी करतानाच ग्रामस्थांशीही संवाद साधणार आहेत. त्यानंतर ते एक आढावा बैठक घेऊन अधिकाऱ्यांकडून नुकसानीची माहिती घेणार असल्याचेही सामंत यांनी सांगितले. राज्याचे मदत आणि पुनर्वसन मंत्री विजय वडेट्टीवार हे सुद्धा उद्या २० मे रोजी कोकण दौऱ्यावर जाऊन नुकसानीची पाहणी करणार आहेत. २० ते २३ मेपर्यंत ते कोकणातील नुकसानीची पाहणी करणार आहेत. या तीन दिवसाच्या दौऱ्यात ते कोकणात झालेल्या नुकसानीची पाहणी करतानाच अधिकाऱ्यांच्या बैठका घेऊन नुकसानीचा आढावाही घेणार आहेत.