पं. गिंडेंना पं.भीमसेन जोशी जीवनगौरव पुरस्कार

मुंबई : दरवर्षी राज्य शासनातर्फे शास्त्रीय गायन व वादन या क्षेत्रात प्रदीर्घ काळ उल्लेखनीय कार्य करणाऱ्या कलाकाराचा भारतरत्न पं.भीमसेन जोशी जीवनगौरव पुरस्काराने गौैरव करण्यात येतो. यावर्षी हा मान ज्येष्ठ बासरी वादक पं. केशव गिंडे यांना जाहीर झाला आहे. सांस्कृतिक कार्य मंत्री विनोद तावडे यांनी ही घोषणा मंगळवारी मुंबई येथे केली. या पुरस्काराचे स्वरुप रु. ५ लाख रोख, मानपत्र, सन्मानचिन्ह असे आहे.

सांस्कृतिक कार्य मंत्री यांच्या अध्यक्षतेखाली उस्मान खान, सदानंद नायमपल्ली, शाम गुंडावार, श्रीमती भारती वैशंपायन, बाळ पुरोहित आणि शुभदा पराडकर या मान्यवरांच्या समितीने या पुरस्कारासाठी ज्येष्ठ बासरी वादक पं. केशव गिंडे यांची शिफारस केली होती. किशोरी आमोणकर, पं.जसराज, श्रीमती प्रभा अत्रे, पं. राम नारायण, श्रीमती परवीन सुलताना आणि श्रीमती माणिक भिडे यांना यापूर्वी हा सन्मान प्रदान करण्यात आला होता.

पं. केशव गिंडे यांच्याविषयी...

पं. केशव गिंडे यांचा जन्म ५ सप्टेंबर, १९४२ साली पुणे येथे झाला. संगीतामध्ये त्यांनी पी.एच.डी. केली आहे. लहानपणापासूनच त्यांना बासरी वादनामध्ये अधिक रस होता. एका मुलाखतीमध्ये त्यांनी सांगितले होते कि, “सहाव्या वर्षी हाती धरलेल्या बासरीने जीवन परिपूर्ण केले. नंतर बासरी वादनाचे शिक्षण त्यांनी गुरू स्व. पं. देवेंद्र मुर्डेश्वर, पं. हरिपद चौधरी यांच्याकडे घेतले. केशव गिंडे यांनी देशात आणि परदेशात आयोजित होणाऱ्या संगीत मैफिलीत तसेच आकाशवाणी आणि दूरदर्शन वर अनेक राष्ट्रीय संगीत सभेत सहभाग घेतला. तसेच परदेशातील विद्यापीठात मास्टर डिग्रीच्या मुलांना शास्त्रीय संगीताचे प्रात्याक्षिकासह व्याख्याने दिलेली आहेत.

पं. गिंडे यांनी “केशव वेणू” या बासरीची निर्मिती १९८४ साली केली आहे. या बासरीची नोंद “लिम्का बुक ऑफ वर्ल्ड रेकॉर्डस्” तसेच “गिनीज बुक ऑफ वर्ल्ड रेकॉर्डस्” मध्ये घेण्यात आली आहे. ही बासरी “सात सप्तकात” वाजवण्याचा “गोल्डन बुक ऑफ वर्ल्ड रेकॉर्ड” त्यांच्या नावावर आहे. केशव गिंडे यांना अनेक पुरस्कारांनी सन्मानित करण्यात आलेले आहे. केशव गिंडे हे अमुल्य ज्योती पब्लिक ट्रस्टचे अध्यक्ष असून संगीत आणि बासरीचा प्रचार-प्रसार-प्रबोधन, संशोधन व सवंर्धन याचे कार्य अनेक बासरी वादक शिष्यांच्या सहकार्याने करत आहेत. ४५ वर्षांपेक्षा अधिक काळात केशव गिंडे यांच्याकडे हजारों विद्यार्थ्यांनी शिक्षण घेतले आहे.

माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/