छावा'चा बॉक्स ऑफिसवर दरारा कायम; २१ दिवसांत तब्बल...
Total Views |
मुंबई : लक्ष्मण उतेकर दिग्दर्शित आणि विकी कौशल अभिनीत छावा चित्रपटाने प्रदर्शित होऊन आता २१ दिवस पूर्ण झाले आहेत. छत्रपती संभाजी महाराजांच्या शौर्यगाथेवर आधारित हा भव्य चित्रपट प्रेक्षकांच्या मनात स्थान निर्माण करण्यात यशस्वी ठरला आहे. १४ फेब्रुवारीला प्रदर्शित झालेल्या या चित्रपटाने बॉक्स ऑफिसवर विक्रमी कमाई करत अनेक ब्लॉकबस्टर चित्रपटांचे रेकॉर्ड मोडले आहेत.
तिसऱ्या आठवड्यातही ‘छावा’ची घोडदौड सुरू!
छावाने केवळ भारतातच नाही तर आंतरराष्ट्रीय स्तरावरही दमदार कमाई केली आहे. समीक्षक तरण आदर्श यांच्या रिपोर्टनुसार, या चित्रपटाने तिसऱ्या आठवड्यात स्त्री २ आणि बाहुबली २ (हिंदी) या दोन सुपरहिट चित्रपटांच्या तिसऱ्या आठवड्यातील कमाईलाही मागे टाकले आहे.
स्त्री २ ने तिसऱ्या आठवड्यात ७२.८३ कोटी रुपये कमावले.
बाहुबली २ (हिंदी) ने ६९.७५ कोटी रुपयांची कमाई केली.
छावाने तिसऱ्या आठवड्यात तब्बल ८४.९४ कोटी रुपये कमावले आहेत.
यामुळे तिसऱ्या आठवड्यात सर्वाधिक कमाई करणाऱ्या चित्रपटांमध्ये छावा दुसऱ्या क्रमांकावर आला आहे. पहिल्या स्थानी अल्लू अर्जुनचा ‘पुष्पा २’ असून त्याने तिसऱ्या आठवड्यात १०७.७५ कोटी रुपये कमावले होते.
२१ दिवसांत ‘छावा’चे विक्रमी कलेक्शन
छावाने २१ व्या दिवशी ५.५ कोटी रुपये कमावले असून आतापर्यंत भारतात एकूण ४८३.५५ कोटी रुपये गाठले आहेत. तर, जगभरातील कमाई ५७७.५० कोटी रुपयांवर पोहोचली आहे.
महत्त्वाच्या भूमिका आणि दिग्दर्शन
छावामध्ये छत्रपती संभाजी महाराजांच्या भूमिकेत विकी कौशल आहे, तर महाराणी येसूबाईंची भूमिका रश्मिका मंदानाने साकारली आहे. औरंगजेबाच्या भूमिकेत अक्षय खन्ना आहे. विनीत कुमार सिंह, संतोष जुवेकर, दिव्या दत्ता, आशुतोष राणा आणि डाएना पेंटी यांसारखे प्रतिभावान कलाकारही महत्त्वाच्या भूमिकांमध्ये झळकत आहेत.
‘छावा’कडून आणखी कोणते रेकॉर्ड मोडले जातील?
या चित्रपटाची सध्याची गती पाहता, लवकरच तो ५०० कोटींच्या घरात पोहोचण्याची शक्यता आहे. पुढील आठवड्यात हा चित्रपट अजून कोणते विक्रम मोडतो, याकडे सर्वांचे लक्ष लागले आहे.