
मुंबई, दि.२४ : प्रतिनिधी "राज्यभरातील एसटीची सर्व बसस्थानके "हिंदुहृदयसम्राट बाळासाहेब ठाकरे 'स्वच्छ,सुंदर बसस्थानक' अभिनयाच्या माध्यमातून सुंदर आणि सुशोभित करण्यासाठी आम्ही प्रयत्न करु! अर्थात, हे अभियान केवळ एसटीचे नसून एसटी कर्मचाऱ्यांच्या सोबत प्रवाशांनी देखील यामध्ये सहभाग नोंदवावा. ही एक लोकचळवळ करावी", असे आवाहन परिवहन मंत्री प्रताप सरनाईक यांनी केली. ते कुर्ला बसस्थानक येथे स्वच्छता अभियानाच्या शुभारंभ प्रसंगी बोलत होते.
स्व.बाळासाहेब ठाकरे यांच्या जयंतीनिमित्त परिवहन मंत्री प्रताप सरनाईक यांच्या शुभहस्ते कुर्ला नेहरूनगर बसस्थानकावर 'हिंदुहृदयसम्राट बाळासाहेब ठाकरे स्वच्छ,सुंदर बसस्थानक अभियाना'च्या बोधचिन्हाचे अनावरण करून या अभियानाचा शुभारंभ करण्यात आला. यावेळी बोलताना मंत्री सरनाईक म्हणाले, "आपण आपल्या घरात ज्या पद्धतीने स्वच्छता ठेवतो त्याप्रमाणेच आपण जिथे काम करतो,तेथे देखील आपले घर समजून त्या कार्यालयाची, त्या बसस्थानकाची स्वच्छता ठेवणे हे आपले कर्तव्य आहे. भविष्यात स्वच्छ ,सुंदर सुशोभित बसस्थानके नक्की प्रवाशांना आकर्षित करतील.
स्वच्छतेबाबत परदेशात जेवढी सजगता आणि जागरूकता आहे, तेवढी आपल्या देशात नाही वस्तुस्थिती आहे. या माध्यमातून भविष्यात चांगली सुंदर बसस्थानक प्रवाशांच्या सेवेसाठी उपलब्ध असतील", अशी त्यांनी आशा मंत्री सरनाईक यांनी व्यक्त केली. यावेळी एसटी महामंडळाचे उपाध्यक्ष व व्यवस्थापकीय संचालक डॉ माधव कुसेकर यांनी अभियानाची रुपरेषा मांडली, तर उपमहाव्यवस्थापक जयेश बामणे यांनी आभार मानले. या कार्यक्रमाला एसटीचे अधिकारी व कर्मचारी तसेच प्रवासी मोठ्या संख्येने उपस्थित होते.