शिंदे-ठाकरे गटात राडा! उद्धव, रश्मी ठाकरे, आदित्य ठाकरे ठाण्यात जाणार

Photo - रोशनी शिंदे 

मुंबई : शिवसेना उद्धव बाळासाहेब ठाकरे पक्षाच्या युवती सेना रोशनी शिंदेच्या कासरवडवली येथील ऑफिसमधुन सुटण्याच्या वेळी तिच्यावर शिंदे गटाच्या २० महिलांनी मारहाण करण्यात आली, असा आरोप करण्यात येत आहे. ठाण्यात ठाकरे गटाच्या महिला पदाधिकाऱ्यावर झालेल्या हल्ल्याबद्दल शिंदे गटावर आरोप करण्यात आला आहे. दरम्यान, या प्रकरणात रोशनी शिंदेंची भेट घेण्यासाठी ठाकरे गटप्रमुख उद्धव ठाकरे, त्यांच्या पत्नी रश्मी ठाकरे आणि माजी मंत्री आदित्य ठाकरे ठाण्याला जाणार असल्याची माहिती आदित्य ठाकरेंनी दिली आहे.

 

घोडबंदरच्या कासारवडवली भागात ठाकरे गटाच्या रोशनी शिंदे यांच्यावर कार्यालयात शिरून काही महिलांनी हल्ला केल्याचा प्रकार सोमवारी रात्री उघडकीस आला आहे. या घटनेनंतर ठाकरे गटाचे खासदार राजन विचारे, जिल्हाप्रमुख केदार दिघे यांच्यासह शेकडो कार्यकर्त्यांनी कासारवडवली पोलीस ठाण्याबाहेर ठिय्या मांडला. तसेच हल्लेखोरांवर कारवाई करण्याची मागणी केली जात आहे.

 

ठाकरे गटाच्या रोशनी शिंदे या घोडबंदर भागातील युवती सेनेच्या पदाधिकारी आहेत. येथील एका खासगी कंपनीत त्या काम करतात. कार्यालयात असताना सोमवारी रात्री काही महिलांनी त्यांच्यावर हल्ला केला. या घटनेचे सीसीटीव्ही चित्रीकरणात कैद झाले आहे. हा हल्ला शिंदे गटाच्या महिला कार्यकर्त्यांनी केल्याचा आरोप रोशनी शिंदे तसेच ठाकरे गटाकडून केला जात आहे.

या प्रकारामुळे ठाकरे गटाचे ठाण्याचे खासदार राजन विचारे, जिल्हाप्रमुख केदार दिघे यांनी शेकडो कार्यकर्त्यांसह कासारवडवली पोलीस ठाण्याबाहेर जमून ठिय्या मांडला. तसेच हल्लेखोरांवर गुन्हा दाखल करण्याची मागणी त्यांनी केली. तसेच घोषणाबाजी केली. रोशनी यांनी याप्रकरणी पोलिसांकडे तक्रार अर्ज केला आहे. परंतु मंगळवारी सकाळपर्यंत याप्रकरणी कोणताही गुन्हा दाखल करण्यात आला नव्हता.

 

या घटनेनंतर महाविकास आघाडीकडून टिकेची झोड उठविली जात आहे. आमदार जितेंद्र आव्डाड यांनी ट्विट करत मुख्यमंत्री एकनाथ शिंदे आणि पोलिसांच्या कारभारावर टिका केली आहे. ‘ठाकरे गटाची रोषणी शिंदे हिला ठाण्यात शिंदे गटाकडून मारहाण, मला खात्री आहे काही होणार नाही. न्यायाची अपेक्षा सोडली. सरकार कसे चालवायचे हे मुख्यमंत्री शिंदे यांच्या कडून शिकावे .. पोलिस खात्याचे अस्तित्वच नाही ठाण्यात … विचारले तर पोलिस सांगतात वरुन प्रेशर आहे .. वरुण म्हणजे? असे ट्विटमध्ये म्हटले आहे. तर खासदार राजन विचारे यांनी पोलीस यंत्रणा दबावाखाली काम करत असून मारहाण करण्याचा पोलिसांनीच यांना परवाना दिला आहे का? असा प्रश्न विचारला आहे.