रामदास कदमांना दणका! सख्ख्या भावावर ईडीची कारवाई, अनिल परब अडचणीत

मुंबई : दापोलीतील साई रिसॉर्ट प्रकरणात ईडीने मोठी कारवाई केली आहे. शुक्रवारी सकाळी साडेआठ वाजता खेड येथील साई रिसॉर्टमध्ये ईडीचे पथक दाखल झाले. त्यानंतर रामदास कदम यांचे सख्खे बंधू सदानंद कदम यांना ताब्यात घेण्यात आले. त्यानंतर त्यांची रवानगी आता मुंबईतील ईडी कार्यालयात होणार आहे. ईडी चौकशीसाठी सदानंद कदम यांना घेऊन जात असल्याची प्रार्थमिक माहिती आहे. दापोलीतील साई रिसॉर्ट घोटाळ्या प्रकरणातील ही कारवाई आहे.

सकाळी ईडीचे पथक भरणे नाका येथील रिसॉर्टवर दाखल झाले. सदानंद कदम यांना चौकशीसाठी ताब्यात घेत असल्याची सूचना ईडीच्या अधिकाऱ्यांनी दिली. कदम यांच्याकडून विचारणा केली असता प्रार्थमिक चौकशीसाठी आपण ताब्यात घेत आहोत, अशी माहिती देण्यात आली आहे. कदम यांना मुंबईला हलवण्यात येणार असून त्यांना चौकशीनंतर न्यायालयात हजर केले जाणार असल्याची माहिती आहे.