राहुल गांधींना ब्रिटनच्या न्यायालयात खेचणार

लंडन : काँग्रेस नेते राहुल गांधी यांनी मोदी आडनावावरुन केलेले विधान त्यांना महागात पडत आहे. न्यायालयाने ताशेरे ओढल्यानंतर त्यांची खासदारकी गेली. आता आयपीएलचे संस्थापक ललित मोदी यांनी राहुल गांधी यांच्यावर जोरदार हल्ला चढवत त्यांना ब्रिटनच्या न्यायालयात खेचणार असल्याचा इशारा दिला आहे.ललित मोदींनी यांनी त्यांच्या ट्विटर हँडलवरून ट्विट करून हा इशारा दिला आहे. वास्तविक, ललित मोदींचे हे वक्तव्य अशा वेळी आले आहे, जेव्हा राहुल गांधी यांना नुकतेच मोदी अपमान प्रकरणी दोषी ठरवून गुजरातच्या न्यायालयाने २ वर्षांची शिक्षा सुनावली आहे.

न्यायालयाच्या निर्णयानंतर राहुल गांधींना संसदेतून अपात्र ठरवण्यात आले आणि त्यांचे सदस्यत्व रद्द करण्यात आले. या कारवाईमुळे काँग्रेस सातत्याने केंद्र सरकारवर आरोप करत असून सत्ताधारी भाजपच्या वतीने राहुल यांच्यावर हल्लाबोल केला जात आहे.दरम्यान ललित मोदी यांनी एकामागून एक ट्विट करत, “मला कोणत्या आधारावर फरार म्हटले जात आहे, मला कधीच दोषी ठरवण्यात आलेले नाही,” असा प्रश्न आयपीएलचे संस्थापक मोदी यांनी केला.ललित मोदी यांनी काँग्रेस पक्षावरही जोरदार हल्ला चढवला आहे. ललित मोदी म्हणाले की, “विरोधकांकडे काहीच काम नाही, त्यामुळे एकतर ते चुकीची माहिती ठेवतात किंवा सूडाच्या भावनेने असे करतात”.