काँग्रेस नेते आणि ऊर्जामंत्री नितीन राऊत यांना कोरोनाची लागण!

मुंबई : राज्यातील कोरोनाचा प्रादुर्भाव वाढत चालला आहे. अनेक नेते आणि मंत्री कोरोनाच्या विळख्यात सापडत आहेत. अशात आता काँग्रेस नेते आणि ऊर्जा मंत्री नितीन राऊत यांना कोरोनाची लागण झाली आहे. लक्षणे नसल्यामुळे ते तूर्तास घरी क्वारंटाइन झाले आहेत. राऊत यांनी ट्विटरवरून ही माहिती दिली. तसेच माझ्या संपर्कात आलेल्यांनी कोरोनाची चाचणी करून घ्यावी असे आवाहनही त्यांनी केले आहे. नितीन राऊत यांच्या पत्नीलाही कोरोनाची लागण झाली असून त्यांच्यावर खासगी रुग्णालयात उपचार सुरू आहेत.

“माझी कोव्हिड चाचणी आज पॉझिटिव्ह आली. गेल्या काही दिवसांपासून माझ्या संपर्कात आलेल्या सर्वांना विनंती करु इच्छितो, की सावधगिरीचा उपाय म्हणून त्यांनी आपापली कोरोना चाचणी करुन घ्यावी. प्रत्येकाने सुरक्षित राहा आणि काळजी घ्या” असे आवाहन नितीन राऊत यांनी ट्विटरवरुन केले आहे.

कोरोना विषाणूने संपूर्ण देशात धुमाकूळ घातला आहे. राज्यात कोरोना रुग्णांचा आकडा दिवसेंदिवस वाढत आहे. आतापर्यंत ठाकरे सरकारमधील अनेक नेत्यांना कोरोना विषाणूचा संसर्ग झाला आहे. यातील सर्वांनी कोरोनावर यशस्वीरित्या मात केली आहे. दरम्यान, गेल्या आठवड्यात काँग्रेसचे कार्याध्यक्ष आणि राज्यमंत्री विश्वजीत कदम यांना कोरोना विषाणूचे सक्रमण झाले होते. परंतु, त्यांना कोरानाची लक्षणे नसल्याने घरातच होम क्वारंटाईन करण्यात आले होते. सध्या त्यांची प्रकृती स्थिर आहे.