अमेरिकेने परदेशी विद्यार्थ्यांसाठी व्हिसा नियम केले आणखी कडक

वॉशिंग्टन : अमेरिकेने परदेशी विद्यार्थ्यांसाठी व्हिसा नियम अधिक कठोर केले आहेत. नवीन विद्यार्थ्यांच्या व्हिसा मुलाखती तात्पुरत्या थांबविण्यात आल्या आहेत. या निर्णयामुळे भारतासह अनेक देशांतील विद्यार्थ्यांवर परिणाम होण्याची शक्यता आहे.

अमेरिकेच्या परराष्ट्र मंत्रालयाने सांगितले की, विद्यार्थ्यांच्या सोशल मीडिया खात्यांची तपासणी करण्यासाठी नवीन प्रणाली तयार केली जात आहे. या प्रक्रियेसाठी वेळ मिळावा म्हणून नवीन व्हिसा मुलाखती थांबविण्यात आल्या आहेत. या नवीन नियमांनुसार, विद्यार्थ्यांनी सोशल मीडियावर केलेल्या पोस्ट्स, शेअर केलेली माहिती, आणि व्यक्त केलेले राजकीय विचार तपासले जातील. जर एखाद्या विद्यार्थ्याने अमेरिकेच्या धोरणांविरुद्ध किंवा राष्ट्रीय सुरक्षेला धोका पोहोचवणारे काही पोस्ट केले असेल, तर त्याचा व्हिसा नाकारला जाऊ शकतो.

अमेरिकेच्या परराष्ट्र सचिव मार्को रुबिओ यांनी सांगितले, जर एखादा विद्यार्थी अमेरिकेत येऊन गोंधळ घालण्याचा, आंदोलने करण्याचा किंवा इतर कृती करण्याचा विचार करत असेल, तर त्याला व्हिसा देण्यात येणार नाही. अमेरिकेतील काही विद्यापीठांमध्ये झालेल्या पॅलेस्टाईन आंदोलनांनंतर सरकारने हे पाऊल उचलले आहे. या आंदोलनांमध्ये सहभागी झालेल्या काही विद्यार्थ्यांचे व्हिसा रद्द करण्यात आले आहेत. काही विद्यार्थ्यांना लहान गुन्ह्यांसाठी, जसे की ट्रॅफिक नियमांचे उल्लंघन किंवा मद्यपान, यासाठीही व्हिसा रद्द करण्यात आले आहेत.

विद्यार्थ्यांनी या गोष्टी केल्यास त्यांचा व्हिसा रद्द होऊ शकतो:



शिक्षणक्रम पूर्ण न करणे किंवा वर्गांना गैरहजर राहणे, व्हिसाच्या अटींचे उल्लंघन करणे, अनधिकृतरित्या नोकरी करणे, सोशल मीडियावर अनुचित किंवा देशविरोधी पोस्ट करणे.

या नवीन नियमांमुळे अनेक विद्यार्थ्यांमध्ये भीतीचे वातावरण निर्माण झाले आहे. काही विद्यार्थ्यांनी सोशल मीडियावरील आपले खाते बंद केले आहे, तर काहींनी सार्वजनिक ठिकाणी जाणे टाळत आहेत.

अमेरिकेतील विद्यापीठांमध्ये सध्या सुमारे ११ लाख आंतरराष्ट्रीय विद्यार्थी शिक्षण घेत आहेत. या नवीन नियमांमुळे त्यांच्या शिक्षणावर आणि भविष्यातील योजनांवर परिणाम होण्याची शक्यता आहे.