मूनलायटिंग मुळे रातोरात ३०० जण बेकार! इथे वाचा सविस्तर

 

 

 

 

मुंबई : भारतातील प्रसिद्ध उद्योजक असलेल्या अझीम प्रेमजी यांच्या विप्रो समूहाला रातोरात ३०० कामगारांना कामावरून काढून टाकण्याची वेळ आली. कर्मचाऱ्यांनी असे काही करणे हे कंपनीच्या तत्वांना हरताळ फासण्यासारखे आहे असे स्पष्टीकरण अझीम प्रेमजी यांच्या विप्रो समूहाने दिले आहे. देशातील आघाडीचा उद्योगसमूह आणि मोठी दानशूर व्यक्ती असलेल्या अझीम प्रेमजी यांच्यावर ही वेळ का आली याचे स्पष्टीकरणही कंपनीने दिले आहे. याच मुनालायटिंगचे स्वीगी सारख्या फूड डिलिव्हरी कंपनीने समर्थन केले असून त्यांनी अशा प्रकारे काम करण्यासाठी आपल्या कर्मचाऱ्यांना प्रोत्साहन देण्यास सुरुवात केली आहे. याच पार्श्वभूमीवर मुनलायटिंग म्हणजे नेमके काय हे समजून घेणे आवश्यक ठरते.

 

 

थोडक्यात सांगायचे झाल्यास मुनलायटिंग म्हणजे एक काम करत असताना फावल्या वेळात अजून एक काम करण्याची मुभा आणि त्याच बरोबरीने त्यातून पैसे मिळवण्यास कुठलीही आडकाठी न करणे म्हणजे मूनलायटिंग. अशा प्रकारे काम करण्यास परवानगी देऊन कर्मचाऱ्याचा जीवनस्तर उंचावणे, तसेच त्यानं त्यांच्या आवडीचे काम करण्याची संधी मिळणे या गोष्टींचा फायदा होतो खरा पण याचबरोबरीने कर्मचाऱ्यांचे त्यांच्या मूळ कामाकडे दुर्लक्ष होण्याचीही शक्यता असते. या मुनलायटिंग बद्दल संपूर्ण उद्योजकता क्षेत्रात दोन मतप्रवाह आढळतात. यासाठीच या मूनलायटिंगला सर्वमान्यता मिळालेली नाही.

 

 

अझीम प्रेमजी यांच्या विप्रो समूहाने नेमकी याच कारणावरून ही एवढी मोठी कर्मचारी कपात केली आहे. या बद्दल स्पष्टीकरण देताना विप्रोचे कार्यकारी अध्यक्ष रिषद प्रेमजी यांनी मुनलायटिंगच्या धोक्याबद्दलच सांगितले आहे. ते म्हणले "जर आपण मुनलायटिंगची व्याख्या नीट जर बघितली तर ते एकाच कामावर असताना दुसरे अजून एक काम करण्याची आणि पैसे कमावण्याची मुभा देणे असा आहे, पण आम्हांला असे आढळून आले की हे कर्मचारी मुनलायटिंगच्या नावाखाली विप्रोच्या स्पर्धक कंपन्यांसाठी काम करत होते. यामुळे आमच्या कंपनीचे नुकसान होऊ शकते आणि हा खूप गंभीर प्रकारचा गुन्हा असून आम्ही त्याची दखल घेऊन ही कारवाई केली आहे" असे रिषद यांनी आपल्या स्पष्टीकरणात म्हटले आहे.