६ अभिनेत्रींसोबत झळकणार स्वप्नील जोशी; 'बाई गं' चित्रपटाची रिलीज डेट जाहिर

03-Jun-2024

Total Views | 60

मुंबई : ‘झिम्मा’, ‘बाईपण भारी देवा’, ‘नाच गं घुमा’ या स्त्री प्रधान चित्रपटांच्या यादीत आणखी एक चित्रपट लवकरच सामील होणार आहे. स्वप्नील जोशी याची प्रमुख भूमिका असणारा ‘बाई गं’ हा चित्रपट लवकरच प्रदर्शित होणार असून यात ६ अभिनेत्री झळकणार आहेत.

आतापर्यंत कायम लव्हस्टोरीमध्ये लव्ह ट्रँगल होताना दिसत होता, पण आता हे चित्र थोड बदलणार आहे. एक अभिनेता आणि सोबत तब्बल ६ नायिका ही संकल्पनाच या चित्रपटाची उत्सुकता वाढवणारी आहे. ‘बाई गं’ हा चित्रपट प्रेक्षकांना निखळ मनोरंजन देणार असून, यात हलक्या फुलक्या विनोदाची मेजवानी असणार आहे.

दमदार कलाकारांची टीम ही या चित्रपटाची आणखी एक जमेची बाजू ठरणार आहे. यामध्ये स्वप्नील जोशी मुख्य अभिनेता असून यामध्ये तो वेगवेगळ्या वयोगटातील हरहुन्नरी सहा अभिनेत्रींसोबत दिसणार आहे. सुकन्या मोने, प्रार्थना बेहेरे, अदिती सारंगधर, दीप्ती देवी, नम्रता गायकवाड, नेहा खान अशा अफलातून अभिनेत्री 'बाई गं' चित्रपटात मुख्य भूमिकेमध्ये दिसणार आहेत. सोबतच सागर कारंडे देखील विशेष भूमिकेत असणार आहे.

नितीन वैद्य प्रोडक्शन, ए बी सी क्रिएशन आणि इंद्रधनुष्य मोशन पिक्चर्स प्रस्तुत एक नवी कोरा, धमाल असलेला 'बाई गं' हा नवा चित्रपट येत्या १२ जुलैला सिनेमागृहात प्रदर्शित होत आहे. पांडुरंग जाधव दिग्दर्शित या चित्रपटाची निर्मिती डॉ. आशिष अग्रवाल, नितीन प्रकाश वैद्य सोबत ओ एम जी मीडिया व्हेंचर्स यांनी केली आहे.