जम्मूमधील 'नियंत्रण रेषे'जवळ घुसखोरीचा प्रयत्न लष्कराने हाणून पाडला!

 

 

 

 

जम्मू: लष्कराच्या जवानांनी जम्मू जिल्ह्याच्या पुढे भागात नियंत्रण रेषेजवळ दहशतवाद्यांचा घुसखोरीचा प्रयत्न हाणून पाडला असल्याचे लष्कर अधिकाऱ्यांनी बुधवारी दि. २४ ऑगस्ट रोजी सांगितले. पल्लनवाला सेक्टरमध्ये मंगळवारी दि. २३ ऑगस्ट रोजी रात्री दहशतवाद्यांच्या एका गटाने भारतीय हद्दीत घुसखोरी करण्याचा प्रयत्न केला. सतर्क सैनिकांनी त्यांच्यावर गोळीबार केल्याने त्यांना माघार घ्यावी लागली. जम्मू भागात नियंत्रण रेषेजवळ गेल्या ७२ तासांत दहशतवाद्यांचा घुसखोरीचा हा तिसरा अयशस्वी प्रयत्न आहे.

 

 

राजौरीच्या नौशेराच्या झांगर सेक्टरमध्ये दि. २१ ऑगस्ट रोजी तैनात असलेल्या सतर्क सैनिकांनी नियंत्रण रेषेच्या भारताच्या बाजूने दोन ते तीन दहशतवाद्यांची हालचाल पाहिली आणि त्यांना आव्हान दिले, असे अधिकाऱ्यांनी सांगितले. एका दहशतवाद्याने पळून जाण्याचा प्रयत्न केला, परंतु जवानांच्या गोळीबारात तो जखमी झाला आणि त्याला जिवंत पकडण्यात आले. त्याच्या मागे लपलेले आणखी दोन दहशतवादी पळून जाण्यात यशस्वी झाल्याचे त्यांनी सांगितले. दि. २२ आणि २३ ऑगस्टच्या मध्यरात्री दुसऱ्या घुसखोरीच्या प्रयत्नात दोन ते तीन दहशतवाद्यांच्या गटाने नौशेराच्या लाम सेक्टरमध्ये घुसखोरीचा प्रयत्न केला. ते माइनफिल्डमध्ये पुढे सरकत असताना स्फोटांची मालिका सक्रिय झाली आणि दोन दहशतवाद्यांचा घटनास्थळी खात्मा करण्यात आला, असे अधिकाऱ्यांनी सांगितले.