अनिल परब गोत्यात?, निकटवर्तीयांवर धाडी! सोमय्या २६ मार्चला रिसॉर्टवर जाणार

प्राप्तीकर विभागाकडून गेल्या काही दिवसांपूर्वी निकटवर्तीयांवर करण्यात आलेल्या धाडींमुळे राज्याचे परिवहनमंत्री अनिल परब अडचणीत येण्याची शक्यता व्यक्त करण्यात येत आहे. मुंबई, पुणे, सांगली आणि रत्नागिरीतील एकूण २६ मालमत्तांवर धाडी टाकण्यात आल्याचे प्राप्तीकर विभागाकडून स्पष्ट करण्यात आले आहे. यादरम्यान केलेल्या कारवाईबाबत प्राप्तीकर विभागाकडून रीतसर माहिती जारी करण्यात आली असून, यावरून विरोधकांनी आगामी दिवसांत परब अडचणीत येणार असल्याची शक्यता वर्तविली आहे.

दापोली स्थित जमिनींसंदर्भात प्राप्तीकर विभागाने परब यांच्या निकटवर्तीयांविरूद्ध धाडी टाकल्या होत्या. यात तपास संस्थेकडून कारवाईच्या रडारवर आलेले सरकारी अधिकारी बजरंग खरमाटे आणि संजय कदम यांच्याशी संबंधित असल्याचा आरोप भाजप नेते किरीट सोमय्या यांच्याकडून करण्यात आला आहे. अनिल परब, सदानंद कदम, बजरंग खरमाटे हे कोट्यवधींची रोकड, अपारदर्शक व्यवहार आणि आर्थिक अफरातफरीमध्ये सहभागी असून, संबंधितांवर प्रवर्तन निर्देशनालयाने (ईडी) कारवाई करावी, अशी मागणी सोमय्या यांनी नुकतीच केली आहे.

राज्य सरकारी अधिकार्‍याच्या प्रकरणात चौकशीदरम्यान त्यांनी, त्यांच्या कुटुंबातील सदस्यांनी आणि नातेवाईकांनी मागील दहा वर्षांच्या काळात पुणे, सांगली आणि बारामती येथील प्राइम लोकेशनमध्ये मालमत्तांच्या स्वरुपात प्रचंड संपत्ती खरेदी केल्याचे उघड झाले. त्यांच्या कुटुंबाकडे पुण्यात एक बंगला आणि एक फार्म हाऊस, तासगावमध्ये एक भव्य फार्म हाऊस, सांगलीत दोन बंगले, तनिष्क आणि कॅरट या नामांकित ब्रँडची शोरूम आहेत.