‘हिंदू हेरिटेज मंथ’ला अमेरिकेत वाढता प्रतिसाद

वॉशिंग्टन : ‘हिंदू हेरिटेज मंथ’साठी (हिंदू वारसा महिना) जय्यत तयारी सुरू झाली असतानाच अमेरिकेत यासाठी दिवसेंदिवस अधिकच प्रतिसाद वाढत असल्याचे चित्र आहे. फ्लोरिडानंतर टेक्सास, न्यू जर्सी आणि ओहयो या राज्यांतही ‘हिंदू हेरिटेज मंथ’ साजरा करण्यात येणार आहे. या राज्यांच्या राज्यपालांनी याबाबत लेखी निवेदन जारी करत ‘हिंदू हेरिटेज मंथ’ला आपला पाठिंबा असल्याची घोषणा नुकतीच केली. यामुळे अमेरिकेतील हिंदू धर्मीयांमध्ये आनंदाचे वातावरण असल्याची माहिती अमेरिकेतील हिंदू स्वयंसेवक संघाचे कार्यकर्ते विकास देशपांडे यांनी दै. ‘मुंबई तरुण भारत’ला बुधवार, दि. २२ सप्टेंबर रोजी दिली.

 

 

हिंदू परंपरांच्या बदनामीचा कट रचत काही हिंदुत्वद्वेष्ट्यांनी सप्टेंबर महिन्यात अमेरिकेमध्ये ‘डिस्मँटलिंग ग्लोबल हिंदुत्व कॉन्फरन्स’ आयोजित केली होती. मात्र, याच अमेरिकेत आता ऑक्टोबर हा संपूर्ण महिना ‘हिंदू हेरिटेज मंथ’ म्हणून साजरा करण्यात येणार आहे. विविध राज्यांच्या राज्यपालांनी याबाबत लेखी निवेदन प्रसिद्ध करत तशी घोषणाही केली आहे. सप्टेंबरमध्ये ‘डिस्मँटलिंग ग्लोबल हिंदुत्व कॉन्फरन्स’चे आयोजन झाल्यानंतर दुसर्याच महिन्यात अमेरिकेमध्ये ‘हिंदू हेरिटेज मंथ’ साजरा होणे आणि त्याला अमेरिकेतील विविध राज्यांमध्ये दिवसेंदिवस वाढता प्रतिसाद मिळणे म्हणजे ही हिंदुत्वद्वेष्ट्यांसाठी ही मोठी चपराकच आहे.

 

 

हिंदू समाजातील नागरिकांनी अमेरिकेच्या विविध क्षेत्रांच्या विकासात बहुमूल्य योगदान दिले आहे. विज्ञान, शिक्षण, कायदा, राजकारण, व्यवसाय, संस्कृती, क्रीडा आणि अन्य विविध क्षेत्रांतील हिंदू समाजातील नागरिकांचे योगदान न विसरता येण्यासारखे आहे. हिंदू समाजातील वारसा, परंपरा आणि संस्कृती आदींमुळे अमेरिकेतील राज्ये समृद्ध झाले असून, याच कारणात्सव ऑक्टोबर हा संपूर्ण महिना ‘हिंदू हेरिटेज मंथ’म्हणून साजरा करण्यात येणार आहे.