वाझे ते लेटर ठेवायचं विसरला आणि कॅमेरात झाला कैद...

मुंबई : उद्योगपती मुकेश अंबानी यांच्या अँटीलिया या घराबाहेर सापडलेल्या स्कॉर्पिओ प्रकरणात एनआयएच्या हाती मोठा पुरावा लागला आहे. घटनास्थळावरील सीसीटीव्ही फुटेजमध्ये दिसून आले की, सचिन वाझे २५ फेब्रुवारीला स्कॉर्पिओ लावल्यानंतर त्यात धमकीचे पत्र ठेवण्यास विसरला आहे. इनोव्हामध्ये बसून काही अंतरावर गेल्यानंतर वाझेला याची माहिती मिळाली. यानंतर, तो पुन्हा घटनास्थळी पोहोचला आणि स्कॉर्पिओमध्ये ते धमकीचे पत्र ठेवले.

एनआयएच्या सूत्रांनी दिलेल्या माहितीनुसार, याच ठिकाणी पत्र पुन्हा ठेवण्यासाठी जात असताना वाझे सीसीटीव्हीमध्ये कैद झाला. त्यावेळी त्याने सैल पांढरा कुर्ता-पायजामा घातला होता. तसेच पीपीई किटदेखील चढविला होता. अँटीलिया बाहेर मिळालेल्या स्कोर्पियोत एक धमकीचे पत्र ठेवले होते, ज्यामध्ये असे लिहिलेले होते, "प्रिय निता भाभी आणि मुकेश भैय्या आणि कुटुंबीय.हा फक्त ट्रेलर आहे.पुढच्या वेळी, आपल्या कुटुंबात उड्डाण करण्यासाठी पुरेसे सामान असेल. याची काळजी घ्या."

गेल्या आठवड्यात एनआयएची टीम वाझेसह त्याच ठिकाणी परत आली होती आणि संपूर्ण घटनेचे रिक्रिएशन करण्यात आले. म्हणजेच ज्याप्रकारे गुन्हा घडला, त्याची पुनरावृत्ती झाली. एनआयएचा यामागील हेतू असा होता की या प्रकरणाच्या चौकशीत कोणतीही कमतरता असू नये. यावेळी, तो पांढरा कुर्ता-पायजामा परिधान करुन डमी स्कॉर्पिओदेखील चालविण्यात आली.

या प्रकरणात लॉजिस्टिक मदतीसाठी वाझेने विनायक शिंदेला ५० हजार रुपये दिले होते, असेही तपासात उघड झाले आहे. सूत्रांनी दिलेल्या माहितीनुसार शिंदे यांच्या माध्यमातून वाझे दक्षिण मुंबईत एका क्लब चालवणाऱ्या माणसाच्या संपर्कात आला. या क्लबमध्ये जुगारी आणि बुकींची गर्दी असायची. या ठिकाणीच त्याने या प्रकरणात अटक केलेल्या नरेश गोरे या बुकीची भेट घेतली.